Sulhnu 38 ; London nula Iggy the Inuit

Kar hmasa khan Chaltlang lal Thang­phunga tuchhuan Iggy leh Syd Barret te chanchin kan sawi nual a, he London nula chanchin hi sawi tur a lo tam viau mai a. Kan chhui theih chinah chuan Iggy hna thawhna hmasa ber chu Granny Takes a Trip tih dawrah Shop Assistant hna a ni. He dawr hi “First Psychedelic boutique in Groovy London of the 1960s” tiin an ziak. Psychedelic drugs leh psychedelic rock tih te, Psychedelic arts, psychedelia an tih bawk leh Psychedelic boutique tih ang te hi khang hun laia nun phung pangngai aṭanga danglam duhna vek a ni.

Granny Takes a Trip dawr neitu hi Nigel Waymouth-a a ni a, thla­laka kan tarlan hi a ni. Kum 1966, Mizoram buai kuma din a ni a, King’s Road, Chelsea, London-a awm a ni. Chelsea chu football ngainatute chuan kan hriat lar em em hi.

He dawr hi a tirah chuan hippies-ho fuan khawmna, thawmhnaw mak leh dangdai tak tak zawrhna hmun a ni a. A hnu zelah chuan kawr style danglam leh Fashion designer huaisar tak tak chherchhuahna a nih avangin London khawpuia dawr lar a ni pha. Granny Takes a Trip dawr leh Orchid Ballroom kha Iggy address ber chu a ni mai a. He dawra a thawh lai hian London khawpuia model lar tak tak te, musician leh artist lar te a hmelhriat a. USA lama zaithiam leh rock band te pawh a tawn phah a ni.

Kum 2011 khan British Jounalist Mark Blake-an Iggy chu a interview a, mi dang hnena a sawi duh ngai loh a inphawrh viau mai. “Ka hming tak chu Evelyn a ni a, kan naupan laiin kan ṭhenawm naupang pakhatin ka hming hi a lam thiam lo va, Iggy tiin min ko ṭhin a. Tunah chuan mi zawng zawngin min ti Iggy ta a nih hi. New Musical Express thlalatuin ka thla a lak mawl mawlh laiin a hnenah fiamthuin ka nickname chu Eskimo, ka ti a, fiamthu a ni tih hre chungin a hmang zui ta a ni.

Tuipui kama seilian ka ni a, art sikulah ka kal a, kei chu thil nih phung pangngai ning mi, danglam hret duh ka ni a. Kan khua Brighton-ah chuan mi danglam nih ka tum ṭhin a. Rock band lar, The Who te kha an indin chhoh lai ata ka hre hlawm a, Soul music hi ka duh em em a, The Righteous Brothers te hi ka duh asin. Lam hi ka ngaina a, The Cromwellian te, The Flamingo te, The Roaring Twenties te kha ka kal zinna club te chu a ni”.

Mi ṭhenkhatin ṭingṭang a thiam em avanga pathian, tia an koh hial Eric Clapton-a nena an inkawm chhoh dan heti hian a sawi a, “Atirah chuan Clapton-a hi tu nge a nih ka hre mai lo. Cromwellian club-ah kan intawng a, kan inkawm chho zel kha Lionel Bart-a nen min inhmelhriattir a, Brian Epstein-a inah party-ah min hruai ta zel a” tiin. Lionel Bart-a hi lehkhaziaktu leh hla phuah thiam lar a ni a, Brian Epstein-a hi kum 1962 aṭanga 1967 thlenga rock band lar Beatles-ho Manager a ni. Hun eng emaw chen chu Eric Clapton-a nen hian an inkawp ve a ni.

Kum 1960 leh 1970 inkarah khan Iggy hi rimawi khawvelin hunpui lian leh langsar a neihah chuan a tel ve zel a. Rock band lar, The Who khuangpu Keith Moon-a nen an inkawp reng emaw tih laiin Rolling Stones dintu zinga hotu ber Brian Jones-a nen an lo fawr a. Chutih lai vek chuan an guitarist Keith Richard nen an leng dun an lo hmu bawk a. Kum 1968-a Rolling Stones-in an album tih chhuah, Sympathy For The Devil an zir lai leh record lai te khan Iggy hi a tel ve vek zu nia!

Iggy hi party-a lâm ral mai mai anga ngaih theih awmin kan ziak tawh a, mahse chutiang mai chu a lo ni lo. A film channa hmasa ber, In Gear, chu kum 1967-ah tihchhuah a ni a, a thupui ber chu London khawpui nung tak tarlan kha a ni a, Granny Takes a Trips dawra Iggy leh dawr neitu Nigel Waymouth-a te inbe lai leh Iggy che vel lanna film a ni. Kum 2008 khan Iggy The Eskimo Girl tih documentary film siam a ni. Iggy video ṭhahnem fe a awm a, The Underground Youth, Fun Fun Fun With Iggy the Eskimo, Iggy at Port Elliot leh adt., hriat belh duh tan chuan YouTube lamah zawn mai tur a ni.

Kum 1967 April thla khan Alexandra Palace-ah darkar 14 chhung zet mitin chitin hnamtin an fuan khawm a ni ber a. Chutah chuan rock band leh zaithiam dang ten chawhnu her aṭangin zankhuain, atuk khawfing chah thlengin zai leh lam kutpui an hmang a. Iggy la hriat reng chu, “Khami zan khan kan tlaivar chiang hle a, varṭian­ah Pink Floyd chuan min dawi mu riai riai thei hla an sa”, a ti.

“Syd-a kha lar khel chi a ni lo va, mi bawr huai huai te kha a ngaina lo. Zan khat chu Margaret street-a The Speakeasy club-a kan kal ṭumin Syd-a peih lo chung kan hruai lui a. Zan a rei tawh avangin mi pawh an tam lo. Kum hnih kal ta lama Pink Floyd hla lo tihchhuah hit tak mai, See Emily Play tih hla kha mi pakhatin a ngen avangin DJ khan a han zaitir a. Kan pahnih tan lamtual chu an ti awl a, lamtir min tum a ni. Kei chu lamtualah chuan ka chhuak a, ka lam ta a. Syd-a chu a tlan chhuak ta daih a, mi thlir ṭhup nih te kha a duh mang hauh hlei nem” tiin Syd Barret-a kha a hriat dan a sawi thung.

“Kum 1969 March thla khan Syd-a chuan Abbey Road-ah Madcap album kha a record a, mahse a khawsak kha a buai deuh a, Roger Waters leh David Gilmour te khan an rawn buaipui nghe nghe. Tlai khat Syd-a chhuak tur chu zui ka tum a, mahse ina awm turin min ti tlat a. Hmeichhe dang hmu tur nia ka ngaih avangin ka thik deuh hle a, Syd-a chhhuah hnu chuan Syd-a in luahpui Duggie-a chuan min chei mak a, Gilmour-a hnenah min lenpui a. Chuta Syd-a ka va hmu chu ka thinur thut a, ‘Khawnge i bialnu chu a awm’ tiin ka ankhum a, min chhang lo. David Gilmour-a nen record an thun thar chungchang vel an sawi dun a lo ni a. Syd-a leh Dave-a nen chuan kan chhuak ta a, kan chhuah pahin record player pin vuahna chu ka va nek a, Syd-a record play mek chu a inthai rin ta vak a. Eng album nge a nih pawh ka hre lo, an album thar ber a ni tih chauh ka hria. Chuta ṭang chuan Syd-an min hnawtchhuak ta a ni”, tiin.

Syd-a hnen aṭanga a chhuah hnu hian London khawpui chuan Iggy chanchin hi an hre zui hlei thei ta lo va, Chelsea-ah pasal hausa deuh mai a nei an ti a, fa erawh an nei lo a ni awm e. Kumin thleng hian Iggy chanchin hi hriat belh tum an la awm zel a, tun thleng hi chuan Iggy pasal hming leh hnathawh kan hre thei rih lo. Kum 1970 vel aṭangin kum 2000 vel thleng khan Iggy chanchin hi hriat tur a awm lo a ni ber mai, a ṭhian hluite pawhin an hre bik hlawm lo a ni awm e. Kum 2000 hnu lam, kum 50 a pelh hnuah a inlar chhuak leh chauh niawmin an sawi. Iggy puala website an siam chu The Holy Church of Iggy the Inuit tih a ni a. A siamtu chu Reverend Felix Atagong a inti naa, Pastor a ni lo. Internet-ah hmuh mai theih a ni a, FB lamah pawh a awm a, Youtube-ah pawh Iggy video chu 20 chuang a awm.

Tichuan, Iggy chanchin hriat belh duh tan internet-ah an dah belh zel a, video pawh a chanchin ka zir tirh laia awm lo, kumin 2021 June leh October inkarah hian dah belh a awm nual mai. Pathian zarah kan dam ang a, kar leh lamah chuan Iggy hi kan bye bye tawh ang a, sulhnu dang ziah kan tum tawh ang chu.