Sulhnu 98 Thangliana te tlanchhiain Chhimtuipui an thleng leh ta

Kar hmasa khan Thangliana te tlanchhia kha ram­palailengah khawchin hre lovin an tlanchhe ta zel kha a ni a, tui hal dangro dangcharin an tlu hlum lo chauh kha a ni a, Sipai hotu Munro-a nupui ui chuam pawh an rilṭam mangangin an hemhmin ta a nih kha. Tun ṭumah chuan Chhimtuipui an thlen leh dan kan sawi ang.

Munro-a nupui uite duat hem hmin an ei kham kha an muhil ta bawrh bawrh a, zing khua a lo var a, an tho leh ta a. Kal tura an insiam fel vek tawhah chuan an pan tur lam, Chhimtuipui awmna lam nia an rin dan a inang lo va, rei fe an inhnial hnuah Munro-a leh a sipaiten chhuk zawnga kal zel a, mual dung zui zela kal an duh a. Sala lui an zuk pawh ang a, chutaṭang chuan Chhimtuipui an thleng thla thei dawnin an ring a, Thangliana tih loh chuan chu chu an ngaihdan vek a ni. An kal zel duh dan a inan tak loh avangin an inṭhen ta hial a, Munro-a ho chuan mual inkhang chu an zawh thla ta zel a.

Thangliana erawh chuan mual dung zawh thla zel lo vin, khawchhak lam hawia kal chu an himna tur zawk nia a rin avangin Fuzlah-a nen an pahnih chauhin an kal hrang ta a ni. Thui an kal hma, fing khat emaw chauh an kal tiha chuan kawng bel ṭha tak an va pawh hlawl mai a. Lakher rammuho zawh kawng kha a lo ni a, Thangliana te kuliho tlanchhiatna kawng kha a ni bawk. Thangliana chuan Munro-a te ko kir turin Fuzlah-a a tir a, a zu ko kir a, an vai chuan kawngpui chu an zawh leh ta a ni.

Chu kawnga an inzui thliah thliah lai chuan kawng kawi zau lai deuhah hian chau taka Munro-a hming ko ri an hre ta a. An han enchian chuan Munro-a kuli tlanchhe zinga mi kha a lo ni a, kawng sirah chuan a biru a, Lakherho chuan an tlan pel a, him damin a lo tawm ngat ngat a. Tuihal leh rilṭama thih hmabaka a awm tawh nak alaiin a khua a sik zui a, chuvangin a kal zel thei lo a lo ni a. An kuah a, an hruai ve ta a ni. Chu pa sawi dan chuan an tlanchhe ta kha Lakherho khan an rawn umpha thuai a, ṭhenkhat an kap hlum a, a ṭhen chu salah hruaiin hnungkhirhin an kai haw hlawm niin a sawi.

Chawhnu herah Sala lui an thleng a, chu lai chu an lawng thukrua khawmual an kai ṭanna tak kha a ni nghe nghe a. An lawng thuhruk la chhuak tura an va kal chuan a lo bo ve ve tawh a. Lui mawng lamah chhukin lui kamah chuan an inzui thla a, thui vak lovah chuan lawng pakhat zawk chu vaukam lehlamah a lo t^ng an hmu ta a. Chulai tui chu a thuk si a, awl> te an awm ngeia an rin avangin hleuh kai an ngam lo va. Mahse kawng dang a awm loh avangin pakhat chuan a va hleuh kai a, lawng chu a va la a, an vanneih asiamin lawng chu a lo him pial a, an chuang ta vek a. Thangliana hian tunge awle seh hlau chung chunga lawng va latu hi a ziak lang lo. Amah chu a ni lo chiang a, Munro-a pawh a ni lo. Munro-a police a nih a rinawm. Lawng kar fung pakhat chauh an hmuh avangin mau pum an phel a, an tuk chawp a, an lek fur a, lui mawng lamah an inkar thla ta a ni. Sala lui chhuah aṭangin Chhimtuipui luipuiah an inkar chhuk ta tihna a nih chu.

Thangliana chuan lawng kar hi a lo tih ve fo tawh avangin a thiam ber a, lawng hmaah a ding a, a kar ang chuan midang pawh kar turin a zirtir chawp a, zawi zawiin an inkar kal ve ta a ni. Lawngkai pakhat an pelh lai chuan mi buhfai tih buak an hmu a, an ril a ṭam hlawm bawk a, an theih ang angin buh fang tla chu an chhar a, tui nen an lem a. Ngaihṭha takin an inkar ta zel a.

Darkar khat emaw an inkar hnu chuan suar an thleng dawn tih tui ri hum hum aṭang chuan an hre thei a. Thangliana chuan Lakherho lakah Pathianin a chhandam a, suar chhia aṭangin a chhandam leh ang em tih chu a rilru lian ber a ni. Lawng kar thiam tumah an awm loh avangin suar lung khawkrawk kara an lawng a liam thla zur zur tur a han mitthla ngawt pawhin a r^p a ni. Mahse kawng dang awm hek lo, an pan hnai zel a, suar ko an zu thlen chuan tui inkhawh ri chu a ring hle tawh a, biak pawh a inbiak theih tawh loh a ni.

Suar kovah chuan an lawng chu a chhuk liam puat a, lui kam lung leh thingte chu a tlan zut zut ta mai le! Thangliana chuan an lawng karfung chuan kar ṭheuh tur tiin a au vak vak a, lawng chu a leh loh nan kil tinah insemin an mau phel chuan an inkar ṭheuh a. Suara tui lut chu a tam tham bawk a, a inkhawh phuan var suah suah a. Mahse suar sei tak Khawthlang tuipuia Bawrkawlh suar chhia ang kha chu a ni lo, kawi hnih chauh a ni a, lawng thiam tan chuan thil harsa a ni lo. Thangliana te chu thih leh thih tia lut an ni a, rilru ṭawngṭaina nen an theihtawp ṭheuh chhuahin an inkar a, lungpui khawkrawk karah chuan an liam thla puat puat a, him takin a thlanga li dam dupah chu an thleng ta thuai a ni. An thleng thla ta thuai kan ti na a, anniho chuan thih hlauhawm a inkar an in bawk a, rei an ti hle thung.

He lai suar hi kal lamah khan engtin nge an inkar chhoh tiin ka rilruah zawhna a awm nghal a, mah se, a chhanna chu ka rin hriat nghal bawk a. Tui tlemna lai, lawnga inkar theih loh khawpa lui tui a lo pan emaw, suar chhia emaw, lengkir emaw an thlen hian an lawng chu an zawn lawk a, a chhak li, inkar theih khawpa tui tamnaah an dah lut leh mai ṭhin a ni.

An inngaih danah chuan thi lo va ruangin suar chhiar an rawn pel a, li dam dup mai an han thleng chu a in en a, lawm avangin mittui te pawh a luang ta ve ang. Nui hawk hawka inkuah te pawh an ti ang, Thangliana hian a sawi lang lem lo na a, chu chu an awm dan tur a nih a rinawm hle.

Muang diaiin an inkar thla zel a, a phur pawh an phur hle tawh a ni. Chutiang chuan darkar khat emaw an inkar thlak leh hnu chuan Teynwey-a khua an zu thleng leh ta hlawl mai a, ei leh in tur nen an lo hmuak a. An thil tawn avanga lungngaihna leh manganna zawng zawng chu an damchhung hun chanve daih zet emaw an tih laiin Khumiho an zuk hmu chuan mumang ramah a chantir ta a ni. Teynwey-a khua an thlen a, lawng aṭanga vaukam an chhuak chiah chu Thangliana leh Munro-a lawm lutuk chu an inkuah vawng vawng a, lawm avanga mittui tla phungin an inchibai a ni.

Chutiang chuan Thanglianan Phawngpui tlang hneh tuma a fehchhuak chu a hlawhtling lo mai ni lo, thi lova ruangin a lo let leh ta a nih chu.

Pathian zarah kan dam anga a, kar lehah chhunzawm kan tum ang.