Sulhnu 128: Lamsuaka leh Pawi Pasalṭha an inbei

Kar hmasa khan Rolura thlahten Savunga Pukzing an halsak thu kan sawi kha a ni a, tun ṭumah chuan Pasalṭha Lamsuaka leh Pawi pasalṭha inbeih thu kan sawi ang.

Hmawrkera Lalburha awm lai hian Halkha Pawi an run a, chumi thu chu Lamsuaka fapa Sailiankhama nupui Chaltuahkungi Darkim chuan Lamsuaka tupa Chalṭhianga te hnenah thawnthu angin a lo hrilh ṭhin a, Pawi pasalṭha nena an inbeih thu a sawi chu hetiang hi a ni: Halkha Pawi an run ṭum chuan Lamsuaka chu Pawi pasalṭha chhuantawlawl nen kawm karah an in thlurbing ṭiang ṭiang mai a. Pawi pasalṭha chuan fei tle ver vur hi a keng a, Lamsuaka chuan kawlhnam a vilik ve thung a. Pawi pasalṭha chuan a feiin a han chhun zuai zuai ṭhin a, Lamsuaka chu a tawlh hrat hrat ṭhin a, a kawlhnama sah a tum lahin Pawi pasalṭha chu a tawlh zauh zauh bawk a. An han inveh hnai a, an inhmachhawn dan chu mita hmututen hmuhnawm an ti hle a ni.

A runtute lam leh Pawi lam pawhin an pasalṭha chhuantawlawl ve ve inbei chu hmuhnawm an ti a. Indo e ti lo chuan pasalṭha pahnih inthih chilh tum chu hmuhnawm an ti khawp a, an thlir ta ṭhup mai a ni. Lamsuakan kawlhnama sah a tum leh Pawi pa chuan feia chhun a lo tum si a. Lamsuaka chuan a beih pa chu pa namai a ni lo tih hriain a milu lak tawh kut lehlama a ken leh a silai kah ruah tawh chu a dah ṭha sauh sauh a, fimkhur takin a veh ta a. An palian dun si a, an han intawhchilh chuan an hriamhrei a intawk ri leh chhawk ṭhin a. A tu ve ve pawh chuan inpawmchilh an hlauh ve ve avangin an tawlh sawn leh harh harh ṭhin a.

Eng emaw chen an inbeih hnu chuan Pawi pa chu a zam ta deuh nge ni, tlanchhiat pahin a fei chu a khawh zawk a, lo khawng leu zuai lo se chu Lamsuaka hmaiah a bur ngei ang. Lamsuaka chuan a kawlhnamin a lo dang tleu a, Pawi pa chu a um nghal a. Vanduai asiamin Pawi pa tlanchhe hmanhmawh lutuk chuan a tlanna tur en chiang lovin kawtluh ban a su chawrh mai a, a let ta hawl hawl a. Chu chu nang chingin Lamsuaka chuan a kawlhnamin a vit thawih mai a, a sat hlum zui ta a ni. Chumi ṭum chuan Lamsuaka chuan ral lu pathum a lak bakah sal pathum a kawi haw bawk. Lamsuaka te inbei ennawm a zawh veleh midang pawh an inbei chhunzawm leh ta niin an sawi. Lalburha khuaten Pawi an han run hun hi Lalburha Hmawrkera a awm lai emaw Berhbiala a awm lai emaw pawh a ni thei e. Eng pawh ni se, Lamsuakan Lalburha a zui zelnaah hian a hming a chher chho zel a, Lalburha pawhin a thlamuanpui hle a ni.

Lamsuaka leh Pawi pasalṭha inbei hi hmu pha ve lo mah ila, han titi chhunzawm mai mai ila. Mitthlaa lo lang ber chu kum 1971-a chhuak film hmuhnawm zet mai Red Sun kan en kha a ni. Cowboy film-a a changtupa, pa kan tih tak mai Charles Bronson-a leh nula itawm nalh tak Ursula Andress-i te an chang a nih kha. Kha film-ah khan Japan Ambassador-in US President hnena pek tur ngunhnam a ken chu rela an chuan laiin misualin an rawn rawk a. Rela pawisa tam tak an lak bakah Japanese ngunhnam rangkachak fawng chu a danglam bik avangin an chhuhsak tel a. Rel rawktu zinga hotu pakhat zawk, an phatsan avanga thi tura an kalsan (Charles Bronson) chu Japanese Ambassador chuan a enkawl dam a. An ngunhnam roh chu la let turin amah vengtu pasalṭha samurai (Toshiro Mifune) nena a tirh chhuah thu vel a ni. Film hmunawm tak a ni a, Red Indian, Commanche-ho nena an intawn dan leh thil dang hmuhnawm tam tak a awm. Chung chu sawi pawh ka tum lem lo va, ka sawi tum ber chu kha film-ah khan Commanche pasalṭha fei hmang thiam leh Samurai pasalṭha ngunhnam hmang thiam inbei kha a ni. An inbeih chhung a rei lo na a, a mit a la tlat. Khawchhak pasalṭha leh khawthlang pasalṭha inbei khan rilru a dek hranpa ve a, khatianga inbeih kha kan pi leh pute lo tih fo ṭhin a lo ni nen, an incheina thawmhnaw zawng zawng nen, eng emaw ti takin rilru a khawih. Lamsuaka leh Pawi pasalṭha inbeiah khan kawlhnam hmang Lamsuaka kha a chak a, Red Sun-ah pawh Japanese samurai khan a ngunhnamin Commanche pasalṭha kha a vit hlum a ni.

Ṭum khat pawh Lamsuaka ho bawkin Thlantlang Pawi run turin an thawk leh a, mahse an lo hre lawk a ni ang chu, khua an lo tlan chhuahsan vek mai a. Zu bel lian pui pui hi an lo tlansan hlawm a. Tlangvalho chuan in an chak hle mai a, mahse pasalṭhaten in an phal tlat lo va. Zu bel chu mualah lakkhawm tirin Lamsuaka chuan, “Tu mahin in in lo vang, zu in tura chhuak kan ni lo. Ral bei tura kal kan ni a, chin hriat loh ral rama mi lehnghal, sawhkeh vek rawh u”, a ti ta tlat mai a, an sawhkeh a, khawlaiah a luang dul dul mai a ni awm e.

An beih tur khua chuan lo hre lawkin an lo chhuahsan mai ni lovin khaw dang an pun a, fimkhur takin kawng pangngaiah pawh kal lovin khaw lu lama ṭan khalh tumin mualdung an rawn zawh a. An vanneih asiamin Lamsuaka te lamtham tirhte chuan Pawiho rawn thawk chu an lo hmu hmasa a, an lo chang letling ta zawk a. Pawiho lo kalna tur mual chu an ṭan khalh a, mual dung tak maiah chuan thing ṭawi leih lawih hi a ding a. Chumi behchhan chuan silai kau sain Lamsuaka chuan a lo chang a, hnahchhawlin a lo insah hliah a. Pawi pasalṭha chuan hma rawn hruaiin a kalna tur hnim chu a silaiin a rawn keu kaw zat zat a. Lamsuaka chu a rawn keu chhuak ta a, Lamsuaka a hmu chu a ṭe ṭhawt a, silai a lek rem hmain Lamsuaka chuan a silai hnawhna pawnchhe lut hung khawpin hmun leh hmunah a lo sai let tawp mai a ni. Pawiho chiai hlek chhung chuan an lo kap ta ruih ruih a, an that mang ṭhelh a, dama tlan chhuak chu pahnih khat emaw chauh niin an ngai. Hemi ṭuma Lamsuaka te Pawi run hian ral lu an hawn ṭhahnem fe awm e.

Vawi khat leh pawh Lalburha khuate leh Zathawma khuate chu Zathawma hovin Thlantlang Pawi bawk bei turin an chhuak a. An tum angin an han che fuh lo hle mai hi a ni awm a, Thlantlang chu han kap ve bawk mah se, Pawiho chu an lo inchahkhawm a, an lo kap let nek mai a. Chu mai pawh ni lovin Zathawmaho chu ruang chaicheh thlakin an hma lam leh hnung lam aṭangin an bei a, an hual bet tlat mai a. Nungdama chhuah nan an hnung lam aṭanga rawn kaptute chu sut kuak a, puh chhuah a ngai ta a. Lal huaisen hlauh nei lo an lo tih ve fo Zathawman hma a hruai a, an hnung lama hualtute chu chheu darh a, sut kuak tumin an nawr let ta a. Zathawma chu an kap fuh a, a mitko, a mittui luanah tak silaimuin a rawn deng fuh ta a, Lamsuaka pawh a banah na vak lovin an rawn kap fuh ta bawk a. An hotu ber a chet theih tak lovah chuan Lamsuakan hma a hruai ve ta thung a, engtin tin emaw an tlan chhuak thei hram a ni.

Zathawma mittui luana silaimu lut chu a luruh tlang zo si lo deuh hian a tukkhum pawnlang takah a tang a. Tumahin silaimu tang chu an kawm chhuahsak ngam lo va, amah Zathawma chuan, “A tuar ngam mah awm ia, khawnge keiman”, a ti a. Amah chuan a kawm ngawr ngawr a, a kawm chhuak ta hlawl mai hi a ni awm e. Pa naran ni se, thihpui tham zet a ni a, zawn a duh loh avangin Parva tlang thlengin Pawi ram aṭangin kein a kal a. Parva tlangah chuan a tlin ta ngang lo va, a thidang a ni awm e, chutaṭang chuan an zawn haw ta a ni, an ti. Zathawma hian silaia an kahna hi a thihpui lo va, Lalburha bel zelin khaw hran nei siin a hun hman tawpna chu Samlukhai lal a nih lai a ni awm e.

Pathian zarah kan dam ang a, kar leh lamah Pasalṭha Lamsuaka chanchin kan chhunzawm zel ang.