Ni tin nuna tih ngei tur pakhat atan infiamna seng luh a ṭul - Sports Minister
Sports & Youth Services minister Robert Romawia Royte chuan, taksa leh rilru hriselna kawngah Mizo mite inenfiah a ṭul thu leh, infiamna chu ni tin nuna tih ngei tur pakhat anga seng luh a ṭul thu a sawi.ṭ
Aizawl North College-in nimina Electric Veng YMA Hall-a 30th Annual College Week kharna inkhawm an neih a hmanpuinaah Robert Romawia chuan, "Mizo mipuite'n sport hi a hranpaa hun sen thlawnnaah ngai tawh loin, ni tin nun dan phungah tih tur pakhat anga kan lak luh a hun tawh. Hei hi India rama hnam hrisel ber nihna atan kailawn pawimawh a ni," a ti.
Sports Minister chuan, hriselna kawngah Mizote inenfiah a hun tih sawiin, "Phai lama inenkawlna atan sorkarin kum tin cheng vaibelchhe tam tak a seng ziah ṭhinte hi hriselna kawngah Zoram mipuite'n kan tih turte kan tih loh vang a ni thei. Taksa insâwizawi uarin zunthlum, thisen sang leh natna tlángláwn tam zawkte hi pumpelh theih a ni. Sport hi kan ni tin nunah tih tur pakhat anga kan seng luh a, way of life anga kan ngaih a hun tawh," a ti a; mipuiin infiamna an uar chuan damdawia inenkawlnaa sum sên a tlakhniam theih a rin thu a sawi.
Robert Romawia Royte chuan, zirlaite chu an zirnaah tumruhna leh taimakna nen an ṭan phawt chuan an hlawhtling ngei dawn tih hrilhin, "Tumruhna bakah thil tum tihsan a ngai a, tum sang vak lote'n thil ropui tak an ti ngai lo," a ti. Zirlaite chu an zir laia an hun ṭhate bawhpelh lo tura fuihin, "Zirlai hun tihtawp ṭhat tâwk loh hi eizawnna
ṭha hmuh lohna a ni," a ti a; politics tui nû laka inthiar fihlim turin a chah. Smartphone leh internet-te chu an zirna tichhe khawpa hmang lo tur leh ṭangkai taka hman thiam tum turin a fuih bawk.
Aizawl North College-ah hian zirlai 1,203, zirtirtu 36 leh office-a thawk mi 13 an awm mek a; College Week khârnaah hian principal Prof. S Haukhanliana Mate pawhin thu a sawi a ni.