Naga Students’ Federation (NSF)-a Inner Line Regulation Commission (ILRC) chuan Angami Public Organisation (APO)-in Inner Line Permit (ILP) system kalpui dan tur chungchanga thutlukna a siam chu a thlawp a, Naga tribal organization dangte chu he thil chungchangah hian inremna siam turin an ngen.
Thuchhuah an siamah ILRC chuan APO thutlukna chu lawmawm a tih thu a sawi a, hemi rual hian Bengal Eastern Frontier Regulation, 1873 hnuaia venhimna dan mumal taka kalpui a ni lo chhunzawm zel tih tarlangin, chung zingah chuan Dimapur, Chümoukedima leh Niuland-te pawh an tel.
Commission chuan APO-in hmalakna a kalpui hmang hian mimal leh khua leh tui ni lo, an state-a dan loa pem lutte hriatchhuah a tiawlsam dawn a; hnathawh, service leh document chungchanga ruahmannate chu zawm a nih theihna turin hun remchang a siamsak dawn tih an sawi.
ILRC chuan Naga mipuite chuan Nagaland-a dan hriatpuinaa state-a lut, hnathawk, sumdawng leh chengte bakah leilung fate ni lo pawh an dodal lo tih sawiin, dan loa state chhunga pem lut leh dan zawm lote erawh an dodal thu an sawi. Commission chuan APO hmalakna chu an thlawp thu leh, Naga tribal pawl dangte chu thawh hona ṭha neih puiah a sawm a ni.
State sorkar chu dan loa pem lutte chungchang hi ngaihven turin an phut a, Bengal Eastern Frontier Regulation chungchanga national seminar neih zawh hnu, October 1-a Chief Minister hnena lehkha an thehluh chu Chief Minister Office aṭangin a chhanna an la nghah thu an tarlang bawk. NFS hian ILP hi chak leh khauh zawka kalpui an phut a, dan bawhchhiate hremna pek pawh ennawn a, hremna na zawk pek an duh a ni. Check gate leh checking point hrang hrang dinhmun pawh ennawn a, ruahmanna felfai leh chak zawka thuam an duh thu an lo tarlang tawh bawk.
