Manipur-a Meitei/Meetei leh Naga community chuan state khawpui, Imphal-a meeting an neihah Native Peoples' Committee, Manipur (NPCM) tih an din.

Joint committee chu May 21-a Hotel Imphal-a meeting-ah din a ni a, he hunah hian Naga leh Meitei hruaitute chuan Manipur-a cheng leilung faten harsatna hrang hrang an tawh mek leh, inlungrualna leh inremna a awm theih dan tur an sawi ho a ni. NPCM chuan tualchhung mi diktakte venhim hna a thawh dawn bakah, an dikna chanvo leh ram neitu an nihna a humhim sak dawn a ni. Meeting-ah hian member-te chuan Ashang Kasar chu convener atan an ruat a, Ph Deban leh Dr L Phaomei-te chu co-covener an ni dawn a ni.

NPCM-a office bearer leh executive member turte chu Meitei/Meetei leh Naga community aṭanga inrualkhai taka ruat rawtna pawm a ni bawk. NPCM hi policy inzawmkhawmna, dinhmun intluk tlang leh Manipur-a tualchhung mi diktakte ram neitu nihna, dikna chanvo leh hun lo awm turah venhimna leh inremna, democracy bakah inrelbawlna mumal zawka kalpuina atana platform pawimawh tak a ni dawn tih thuchhuahah chuan an tarlang. Meeting-ah hian Makhan khuaah June 2-ah Native People of Manipur tih mipui vantlang tel theihna tur buatsaih a ni dawn tih an sawi bawk.

Committee chuan Manipur aṭanga Assam Rifles chhuahtir leh Suspension of Operations (SoO) a rang thei ang bera tihtawp an rel a, state-a National Register of Citizens (NRC) kalpui thuai an rawt bawk a ni.