Assam cabinet chuan Thawhlehni khan naupang venhimna, youth affairs, labour, zirna leh inrelbawlna huam chhunga hmalakna tur hrang hrang a pawm. Heng zingah hian naupang venhimna policy thar, ṭhalai hamṭhatna atana department siam leh labour dan siamṭhatte a tel. Cabinet meeting hi Dispur-a Lok Sewa Bhawan-ah neih a ni.

Cabinet chuan Silchar-a Mini Secretariat chu Assam Secretariat, Barak Valley, Silchar tia thlak a pawm bawk a, helai hmunah hian department 32 dah a ni ang. Hei bakah Guwahati-a Indian Institute of Management (IIM) leh, Azim Premji University-a permanent campus din tura ruahmanna pawh a pawm bawk a, cooperative societie registration digital-a kalpui pawm a ni bawk.

Chief minister Himanta Biswa Sarma chuan, Youth Empowerment and Welfare Department tharah ṭhalaite tana hmalakna eng emaw zat chu administrative framework khatah dah a ni dawn tih a sawi. Department hian Youth Commission, National Cadet Corps (NCC), Scouts and Guides, Youth and Student Welfare, leh eizawnna kaihhnawiha hmalakna hrang hrang a kalpui dawn a ni. He hmalakna hmang hian hnathawh tur tihpun, eizawnna lama inkaihhruaina, kutkawih eizawnna (entrepreneurship), leadership development leh ṭhalaite tan thawh hona a siam dawn a ni.

Department hi kumin September 17 aṭanga kalpui ṭan tur a ni a, secretariat leh directorate dah a ni dawn a, district level-ah zonal office-te dah a ni bawk ang. Cabinet chuan Assam State Child Protection Policy, 2026, naupang tana venhimna tihchak leh naupang enkawlna hmuna inrelbawlna siamṭhat tumna a pawm bawk. Hei bakah cabinet chuan Assam Juvenile Justice (Care and Protection of Children) Rules, 2026 a pawm bawk.