JCILPS-in campaign thar thawh leh dawn

Manipur leilung fate humhalhna atana inner line permit (ILP) system kalpui phuttu, Joint Committee on Inner Line Permit System (JCILPS) chuan an campaign thar thawh leh an tum.

‘Save Indigenous People’s Campaign’ tih thupui hmanga vantlang inkhawm an buat-saihah JCILPS convenor in-charge, Khomdram Ratan chuan he thu hi sawiin, leilung fate humhalhna beihpui thlak chu January 3-a an ṭan tawh thu sawiin January 4-a lirnghing avangin an tum anga an kalpui theih loh thu a sawi.

Nikum August 31-a Mani-pur Legislative Assembly-in JCILPS phut anga leilung fate humhalhna tur bill pathum a pass hnua, President Pranab Mukherjee hnena bill thehluh a nih hnuah state sorkar chuan an thil phut chungchangah hmalakna a neih tawh lo tiin Ratan chuan a sawi a, state sorkar nena remna thuthlung an siamte pawh tihpuitlin loha a la awm thu a sawi.

Ratan chuan state sorkar nena thuthlung an siamte chu sorkar laipui pawmpuina lak ngai lo a ni, tiin a sawi bawk a, Manipur MP, MLA leh political party te chuan state Assembly bill pass pathumte chu an bawhzui loh thu a sawi bawk.

Kum 1950 khan Chief Commissioner, Himat Singh chuan Manipur-a ILP system a hlip a, hetihlai hian Aruna-chal Pradesh, Mizoram leh Nagaland-ah chuan hman a ni thung, tiin a sawi.

Manipur Legislative Assem-bly pawhin ILP system kalpui duhin vawi hnih resolu-tion a lo pass tawh bawk a ni.

JCILPS convenor, Ratan chuan an thil phut chu ngaih-thahsakah sorkar laipui chu puhin, "Sorkar laipui chuan India danpui hi vawi eng emaw zat a lo amend tawh a, a ṭul chuan amend reng theih a ni," tiin a sawi.

Mipuite chu an campaign thlawp tura ngenin, Manipur leilung fate humhalhna atan state sorkar leh sorkar laipui chu na taka nawr a ngai a ni, a ti.

Manipur Assembly-in nikum August 31-a bill pathum a pass hnu khan Mani-pur tlangram bialah bill dodalna lantir nghal a ni a, Churachandpur-a bill dodal-tute leh state police force te innawrnaah mi pakuain nunna an chan phah a ni.

Hetihlai hian Ratan chuan JCILPS leh Kuki Inpi Manipur chuan January 8 khan Kuki Inn-ah meeting an neih thu sawiin, a lawmawm zawnga meeting an tihtawp thu a sawi.

Churachandpur-a bill pathum dodal avanga mi pakua nunna chan ta chhungte chu a tawrhpui thu sawiin Ratan chuan bill pathum chuan Manipur leilung fate a
ṭhendarh em tih chu nasa taka a ngaihtuah zui nghal thu a sawi.

Tlang mite'n bill pathum an dodal chu inhrilhchian tawk loh vang a nih thu leh mi
ṭhen-khatin thu dik tawk lo an theh-darh vang a ni, a ti.