Minister thih dan report tlangzarh turin HC-in hriattir

14th January, 2016

Tripura High Court chuan kum 1998, March 31-a state Health Minister hlui, Bimal Sinha thah a nih dan chhuina, judicial commission report chu kar ruk chhunga tlangzarh turin state sorkar a hriattir.

Chief Justice Deepak Gupta awmna division bench chuan Thawhlehni khan hemi chung-changa Tripura Congress Women wing president, Kalayani Roy-in PIL a thehluh chu ngaih-tuahin, January 31, 2000-a commission report buatsaih tawh chu mipui hriata tlangzarh turin state sorkar a hriattir a ni.

Kum 1998-a Chief Minister Manik Sarkar-a'n a office a luah aṭanga kar hnih chhungin Health Minister Sinha hi National Liberation Front of Tripura (NLFT) hel nia rinte'n an that a ni.