Congress-in NCHAC-ah sorkar siam tum
North Cachar Hills Auto-nomous Council (NCHAC)-a Congress member 17 chuan sorkar siam tumin, Thawhlehni khan Guwahati-ah Governor PB Acharya an hmu.
NCHAC member te hi Assam Pradesh Congress Committee (APCC) president Anjan Dutta leh Congress hruaitu, Silchar MP Sushmita Dev te'n an ṭawiawm.
Member te hian Governor hnena lehkha an thehluhah NCHAC-a BJP hruaitu leh Chief Executive Member (CEM) ni lai, Niranjan Hojai kaihhruai sorkar chu Autonomous Council relbawlnaa hlawhchhamah puhin, hmasawnna hna thawh chawlhsan vek a nih avangin mipuiin an tuar mek a ni, an ti.
CEM Hojai chu council-a hnathawkte thla sarih chhung hlawh pe thei lo leh rorel thiam loah an puh bawk.
"Hojai kaihhruai Autonomous Council-ah hian beiseina kan nei tawh lo a, tuna sorkar mek kan thlawpna hi kan hnukdawk nghal a, member 30 awmna council-a member 17 chuan 'no confidence motion' hmanga paih kan duh a ni. Hei vang hian sorkar thar a din theih nan a rang lama session min kohsak turin kan ngen che," tiin Congress member te chuan Governor hnena lehkha an thehluhah an tarlang.