Statehood Day pualin 'Clean Arunachal Fortnight' kalpui dawn

Arunachal Pradesh chuan Statehood Day vawi 30-na, February ni 20 a hman tur pualin February 1-13 chhung hian "Clean Arunachal Fortnight" programme a kalpui dawn.

He programme hi Chief Secretary Ramesh Negi duanchhuah niin, a tum ber chu state chhung fai leh hrisel taka vawn a ni a, he mi tur hian mi zawng zawngin mawhphurhna an nei a ni, tiin sorkar thuchhuak chuan a tarlang.

'Clean Arunachal Fort­night' programme kalpui dan tur relin, Chief Secretary Negi-a kaihruaina hnuaiah preliminary meeting neih a ni a, General Administration Commissioner, Finance Secretary, Planning Sec­retary, Art and Culture Secretary, DC Capital, Chief Estate Officer, Urban Development leh PWD aiawhte te an tel.

District tinah Deputy Commissioner ṭheuh te'n he kar hnih chhung awh faina beihpui thlakna hi an kaihruai ang a, mipui te chuan he programme neih hun chhung hian zing tin darkar khat tal an hnatlang ṭhin ang a, zirlai te pawhin an sikul leh a chhehvel te an tifai ṭhin ang.

'Clean Arunachal Fortnight' neih chhung hian state sorkar chuan hlawhtling taka hma lak a nih theih nan NGO hrang hrang te leh mipui zawng zawng te chu kim taka tel ngei turin a ngen.