Railways tihchangtlun nan vbc nuai 8.5 ruahman

Union Minister of State for Railways, Manoj Sinha chuan Indian Railways tihchangtlun nan sorkar laipuiin kum nga chhunga hman tur cheng vaibel-chhe nuai 8.5 a ruahman thu Nilaini khan Agartala-ah a sawi.

Badarpur (Assam)- Agartala (Tripura) inkara rel lian tlan hmasa ber enchhinna inkhawmah Sinha chuan he thu hi a sawi a, March 31-a rel kawng zauh mek zawhfel a nih hun leh Commissioner of Railway Safety (CRS) aṭanga phalna hmuh hunah Badarpur- Agartala inkarah hian rel service tir nghal an tum thu a sawi.

Union Minister Sinha hi Tripura PWD, Health Minister Badal Choudhury leh Transport Minister Manik Dey te'n an
ṭawiawm.

Kilometre 437-a thui, Lum-ding-Silchar leh Badarpur-Agar-tala inkara rel lian tlan theihna atana rel kawng siam hna hi sorkar laipui chuan kum 1996 khan a pawmpui tawh a, kum 2004 khan national project-a puan niin, sorkar laipui budget aṭanga sum ruahman a ni.

Kilometre 210-a thui, Lum-ding-Silchar inkar rel kawng zauh hna hi nikum kum tawp lam zawh a ni tawh a, kilomtre 227-a thui, Badarpur-Agartala inkara rel kawng zauh hna hi thawh mek a la ni a, kumin March thlaa peihfel hman beisei a ni.

Northeast Frontier Railway general manager H.K. Jaggi chuan Badarpur-Agartala inkara rel kawng zauh hna thawhna atan hian cheng vaibelchhe 7,751 sen a nih tawh thu a sawi.

Badarpur-Agartala inkara rel kawngah hian leiverh panga a awm a, lei lian leh te 461 vel a awm bawk. Leiverh thui ber hi kilometre 2-a thui a ni.

Thawhṭanni khan Tripura, Ambassa station aṭangin Agar-tala thleng hian rel lian lu chu tlantir a lo ni tawh bawk.