Governor ban phutin nawrh huaihawt

Arunachal Pradesh Governor JP Rajkhowa leh state sorkar inhmuhthiam lohna avanga Governor ban phuttu, rorellai Congress sorkar ṭantute chuan Ningani khan Itanagar-a Raj Bhavan kawtah nawrh an huaihawt.

Nikum December 17 khan Gauhati High Court chuan Arunachal Pradesh Legislative Assembly Speaker Nabam Rebia paihthlakna atana Governor-in Assembly session a koh chu tihtawpsakin session chu kaltlangpui lo turin a lo hriattir tawh a, mahse Assembly deputy speaker TN Thongdok chuan High Court thuchhuak hi khinglet lehin Nilaini khan hemi chungchang hi ngaihtuah a ni.

Nilainia thubuai ngaihtuahnaah High Court chuan deputy speaker Thongdok-a ṭan zawnga thutlukna a siam avangin Congress party worker lungawi lote hian Ningani khan nawrh an huaihawt zui nghal a ni.

Raj Bhavan kawta nawrhnaah hian Congress MLA pahnih an tel a, Governor an duh loh thu an auchhuahpui bakah Raj Bhavan chu kawngpui chu kaltlang theih lohin an dangchat bawk. Congress party worker te'n nawrh an huaihawt lai hian Governor Rajkhowa hi Raj Bhavan-ah hian a awm reng a ni.

Capital Complex Superintendent of Police (SP), Devender Arya chuan nawrh huaihawtte lakah hian thubuai pahnih an ziahluh thu a sawi.

Arunachal DGP, S. Nithianandam chuan Raj Bhavan kawta nawrh huaihawt tur hi an hriat lawk loh thu sawiin, buaina lian tham chhuak loa nawrh huaihawtte an khuahkhirh theih thu a sawi.

Hetihlai hian Arunachal Governor leh Chief Minister Nabam Tuki-a kaihhruai, state sorkar inkara buaina thleng mek chungchanga Gauhati High Court-in thutlukna a lo siam tawhte khinletna chu Ningani vek khan Supreme Court-ah ngaihtuah a ni.

Supreme Court chuan politics thila Governor leh state sorkar inbeihna chu India danpui chungchangah a nih avangin thubuai chu Constitution bench ngaihtuah atan a dah.

Justices J S Khehar leh C Nagappan te awmna SC bench chuan Governor, Assembly Speaker leh Deputy Speaker te thuneihna chungchang chu India danpuiah a awm avangin bench lian zawkin a ngaihtuah a ngai a ni, an ti.

SC bench-in thutlukna a siam hnu hian political party hrang hrang aiawhtu, senior lawyer- F S Nariman, Kapil Sibal leh Harish Salve te chuan Chief Justice T S Thakur hmu nghalin, Constitutional bench chu a rang lama siam turin an ngen nghal.

Justice Thakur chuan hemi chung-changah hian thutlukna siam thuai a lo tiam a, hemi rual hian Supreme Court chuan Arunachal Assembly chu nimin thlenga inkhawm kalpui lo turin a hriattir nghal.