Tripura Chief Minister Manik Sarkar chuan state chhunga tualthah thubuaite chu police te ngawrh taka an chhui zui ṭhin thu sawiin, dan angin court-ah charge-sheet an thehluh ṭhin thu a sawi.
Sarkar chuan Ningani khan Assembly ṭhut-khawmah Congress MLA Asish Kumar Saha zawhna chhangin he thu hi a sawi a, kum 2013 khan Agartala-ah tualthah thubuai 17 ziahluh a ni, a ti. Heng thubuai kaihhnawihah hian mi 45 man an ni a, thubuai 15-ah charge-sheet thehluh a ni. 
Sarkar chuan Agar-tala-ah hian kum 2014-ah tualthah thubuai 26 leh kum 2015-ah thubuai 17 ziahluh a ni, tih a tarlang bawk. Kum 2014-a thubuai 26 ziahluhah hian mi 36 man an ni a, kum 2015-ah mi 27 man niin, an thubuaite hi court-a thlen nghal a ni. 
"He official record hian tualthah thubuai chhui kawnga police te hnathawh ṭhat zia a tilang a ni," tiin a sawi. 
Hetihlai hian Tripura High Court-in mi pathum thihnaa mawhphurhtua puh, tualchhung chan-chinbu editor pakhat thiam a chantirna chu Sarkar chuan Supreme Court-ah khinlet an tum thu a sawi. 
"High Court thuchhuah hi state sorkar chuan Supreme Court-ah a khinglet dawn a ni," a ti. 
 Tripura High Court chuan nikum December 10 khan district and sessions court-in tualthah thubuaia thiam loh a chantir tawh, tualchhung chanchinbu editor, Sushil Chowdhury (75) chu thiam chantirin, a chhuah zalen a ni. 
Kum 2013, May 19 khan tualchhung chanchinbu, Dainik Ganadoot-a hnathawk pathum- manager Ranjit Chowdhury (61), proof reader Sujit Bhattacharjee (25) leh driver Balaram Ghosh (31) te chu office huam chhungah thia chhar an ni a, he thubuaiah hian West Tripura district and sessions court chuan kum 2014, July 14 khan Sushil Chowdhury hi thiam loh chantirin, damchhung tang turin a hrem a ni.