PHE tui pek mihring ei atan a him lo: KHNAM

Khun Hynniewtrep Natio-nal Awakening Movement (KHNAM) Youth Wing chuan Shillong khawpuia Public Health Engineering department-in tui a pek chu ei atana a him loh thu a tarlang.

Greater Shillong Water Supply Scheme tuizem aṭanga tui sample lain KHNAM hian King Edward VII Memorial Pasture Institute and Medical Research Institute, Shillong-ah a enfiah tir a, tui sample endiktu mithiamte chuan tui chu a al lutuk tiin, an tui pek pH value hi 5.7 a ni, an ti. Tui pH value 7 chin hi tui thianghlim ei tlaka ngaih a ni a, hei aia a hniam a nih chuan tui chu a al a, ei atan a thianghlim tawk lo a ni.

KHNAM Youth Wing president Thomas Passah chuan tui sample hi January 6 khan Pasture Institute-ah enfiah atan an thawn thu sawiin, mi thiamte'n PHE tui pek mihring ei atana him lo tih an tarlang chu mak a tih thu a sawi.

Tui sample enfiahna result chuan tui-ah mihring hriselna khawih pawi thei thil a awm thu a tarlang bawk, tiin Passah chuan a sawi.

KHNAM Youth Wing chuan PHE tui pek enfiahna report hi state PHE Minister hnenah thawnin, a ṭul anga bawhzui turin a ngen.

"Kum 1992 khan United Christian Youth Organisation chuan PHE tui pek hi enfiahtir tawhin, hemi ṭum pawh hian mihring ei atan a him tawk lo tih hmuhchhuah tawh a ni a, PHE hian mihring ei atana him lo, tui hi vawiin thlengin min la pe reng tihna a ni," tiin KHNAM Youth Wing general secretary, Strong Pillar Kharjana chuan a sawi.