BJP an zawm hnuah AGP MLA pahnih an bang

16th January, 2016

BJP an zawm avanga Assam Assembly Speaker PK Gogoi-a'n insawifiah tura a hriattir, Asom Gana Parishad (AGP) MLA pahnih chu MLA an nihna aṭangin a bang.

Dhakuakhana bial aṭanga thlantlin, AGP MLA Naba Doley leh Sootea bialtu MLA, Padma Hazarika te hian Ningani khan Speaker hnenah banna a thehlut.

AGP MLA pahnihte hian nikum December thla khan BJP an zawm a, an lakah AGP-in complaint a thehluh avangin Speaker PK Gogoi chuan January 19 hmaa insawifiah turin a hriattir a, mahse MLA pahnihte hian MLA aṭanga ban an thlang ta zawk a ni.

BJP an zawm avangin Assembly Speaker Gogoi chuan a hmain Congress MLA pakua chu MLA an nihna a lo hlihsak tawh bawk.