2024 Assembly-ah hnam zawng zawng aiawh dah tum : Sikkim CM

Sikkim chief minister Prem Singh Golay chuan kum 2024 assembly inthlan zawhah chuan Sikkim-a hnam zawng zawngte'n state rorelna inah aiawh an nei vek tawh ang tiin a sawi.

Singtam khuaa Teej festival hmannaah Chief Minister Golay hian thu sawiin,"Tuna Sikkim assembly kal mekah hian Newar leh Gurung hnam aiawhte an awm lo a, kum 2019 inthlan khan an hnam candidate tling zo an awm lo a ni. Kum 2024 inthlanah erawh chuan heng hnam aiawhte hi assembly-ah an ṭhut ve ngei tawh nan ṭan kan la ang. Constituency hrang hrangah party hian hnam aiawh tur kan ruat ang," tiin a sawi.

Golay chuan state rorelna hmuna hmeichhiate dinhmun pawh sawiin,"Tun hnai panchayat inthlanah hmeichhiate hi an tling tam tawh a ni. Panchayati Raj-a district chairmen leh vice chairmen 12 awm zinga pasarih chu hmeichhia an ni. Party ticket siam rem a nih hian constituency tam zawkah chuan hmeichhiate hi ding turin kan duh ṭhin, state aiawh tur pawh hian hmeichhia kan la duh ang," a ti bawk.

Mi 1,500-in SDF an zawm

Hetih lai hian Sikkim-a eptu party lian ber Sikkim Democratic Front (SDF) chu mi 1,500 zetin an zawm thar. SDF zawmtu thar zingah hian Bhaichung Bhutia pawh telin, a party Hamro Sikkim Party (HSP) leh SDF te chu an inchhun fin vat dawn niin an sawi.

SDF hian tun hnaiah mass joining programme siamin, mi thar tam takin an zawm a ni. SDF president Pawan Chamling-a piancham, September 22 hian state chhung mi langsar leh political activist lar eng emaw zat chu an la lut dawn niin an sawi bawk. Hemi ni-a lak luh tur zingah hian Bhaichung Bhutia pawh hi a tel a ni.