Northeast Frontier Railway (NFR) hnuaia Railway Protection Force (RPF) chuan September 8 aṭanga 17 chhung khan rel station hrang hrang dap hna an thawk a, naupang 23 an chhanchhuah thu leh, human trafficking ti ṭhin mi pakhat an man thu an sawi bawk.
Northeast-a rel station hrang hrang, heng; New Bongaigaon, New Jalpaiguri, Jalpaiguri Road, Samsi, Badarpur, Barsoi, Rangiya, Katihar leh Dimapur rel station te chu dap niin, heng hmun aṭanga naupang an chhanchhuah 23 te chu child welfare agency kutah leh, a ṭhen chu an chhungte hnenah pek leh an nih thu an sawi a ni. 
September 8 leh 9 khan RPF-te hian Samsi rel station-ah station dap hna an bei a, mihring hmanga sumdawng ṭhin pakhat an man a, ani kut aṭang hian ruk bo ni ngeia hriat hmeichhe naupang pakhat chhanchhuah a ni bawk. Human trafficking kalpuia puh leh hmeichhe naupang hi Malda khuaa GRP kuta pek an ni. 
September 17 khan Rangiya RPF te chuan Rangiya rel station an dapnaah mipa leh hmeichhe naupang tlanbo ni ngeia hriat an chhanchhuah thu an sawi. Heng naupang pahnihte hi Fatima Balika Dayadam, Rangiya-ah hlan an ni. September 9 khan RPF, Maligaon escort party te chuan Guwahati aṭanga Delhi pan tur Bongaigaon rel station-ah naupang pali an chhan chhuak a, naupangte hi Birjhora Children Home-ah dah an nih thu an sawi bawk.
NFR chuan Railway Protection Force te chu an inralring reng a, mi rinhleh zawng emaw, naupang ngaihtuahawm deuh nia lang leh kalpuitu nei lo te, human trafficking chungchanga rinhlelh emaw thlengin uluk takin station chhungah an vil ṭhin a ni, an ti.