Assam Assembly inthlanah Congress-in AIUDF thawhpui tum lo

Assam Pradesh Congress Committee (APCC) chuan state Assembly inthlan neih turah seat 126 aṭangin seat 70 vel an lak theih an beisei thu sawiin, Badruddin Ajmal-a kaihhruai, All India United Democratic Front (AIUDF) chu thawhpui an tum loh thu an puang leh.

APCC president, Anjan Dutta chuan AIUDF thawhpui an tum loh thu sawiin, AIUDF hotu, Ajmal chuan Congress party nena thawhho an tum thu a sawi a, hei hi thu dik lo a ni, a ti.

Ajmal-a pawlte chuan Assam-a hnam tlem zawkte thlawpna a hloh tawh a ni, tiin a sawi bawk.

"Hnam tlem zawkte chuan Ajmal-a hi an duh tawh lo a, hei vang hian Congress party chu thawhpui a duh a ni. AIUDF chu national party tiin a sawi a, national party president meuh a nih chuan kan party high command te chauh a dawr tur a ni. Mahse kan party high command chuan AIUDF nena thawhdun kan tum loh thu an puang tawh a, Ajmal hian thu dik lo a thehdarh mai a ni," tiin Dutta chuan a sawi.

"Sakhua zalenna thlawptute vote chu AIUDF hian ṭhendarh tumin BJP thlawp a tum a ni. Chuan Ajmal hian AIUDF vote tute chu Congress vote tu angah a ngai a ni. Mahse chiang takin ka sawi duh a, AIUDF nen hian kan thawkdun dawn lo," a ti.

Dutta chuan BJP chu Congress leh AIUDF thawkdun tur anga thuthang dik lo thehdarhah a puh bawk.

"Seat 126-ah candidate kan siam vek ang a, seat 70 emaw 71 kan la ang," tia sawiin, AIUDF chuan seat riat pawh a lak a rin loh thu a sawi.

Asom Gana Parishad (AGP) nen thawhho an tum em tia chanchinbu mite zawhna chhangin, Dutta chuan hemi chungchangah hian inbiakna an neih loh thu a sawi.

"AGP-in inbiak an duh chuan kan inpeih a, mahse kan inbiak hnuah chauh thil thleng thei chu puan theih a ni ang," a ti.

APCC hruaitu, Dutta chuan Congress MLA pathum, kum 75 chung lamte chuan inthlan chuh an hreh tawh thu sawiin, mahse an hming a tarlang lo thung.

Hetihlai hian Bharatiya Janata Party (BJP) chuan state Assembly inthlana thawhpui atan AGP hruaitute an bia.

Assam BJP president, Sarbananda Sonowal-a kaihhruai, election management committee chuan kar kal ta Inrinni khan AGP hruaitute hi an hmu a, thawhdun dan tur chungchang an sawiho.

BJP election management committee convenor, Himanta Bishwa Sharma chuan AGP nena an thawhhona tur chu hun reilote chhunga chinfel an beisei thu sawiin, AGP-in candidate atana seat an beisei zat pawh an tichiang ṭep tawh a ni, a ti.

Meeting-ah hian AGP aiawhin, Ramen­dra Narayan Kalita, Keshab Mahanta leh Kamala Kalita te an tel.

BJP party hruaitu pakhat chuan AGP hian seat 42 an beisei niin a sawi a, AGP thawhpui an duh chhan chu Congress duhlotute vote kal darh venna atana an ruahman a ni, a ti.