Helte dolet kawngah State sorkar a hlawhchham: M'laya BJP

BJP Meghalaya state unit chuan Garo Hills huam chhunga dan leh thupek din­hmun chungchangah rorellai Congress sorkar chu hma­chhawn emaw sawichhiat a duh loh thu tarlangin, mahse helte dolet kawngah sorkar chu a hlawhchham a ni, a ti.

Meghalaya BJP unit presi­dent thar, Shibun Lyngdoh chuan he thu hi sawiin, "State sorkar chuan ruahmanna ṭha zawk a duan chhuah ngei ka beisei a, Garo Hills-a dan leh thupek dinhmun siamṭhat nan theihtawp chhuah a beih ka ring tlat a ni. State sorkar hi sawisel ka duh rih lo a ni," a ti.

Hetihlai hian Lyngdoh chuan helte beihlet kawngah state sorkar chu hlawhchhamah puhin, mipui rinna a hloh tawh a ni, a ti.

Helte chuan hmasawnna project hrang hrang kalpui mekte pawh an tiṭhuanawp vek tawh a ni," tiin a sawi bawk.

State sorkar a sawisel duh loh chhan sawiin Lyngdoh chuan, a kaihhruai, state BJP thil tum chu mi tin tana hma­sawnna thlen a ni, a ti.

State sorkarin zirtirtute thla hlawh a hun taka a pek theih loh chungchangah state sorkar chu ṭang mar deuh tura a duh thu sawiin, zirtirtu dinhmun harsa taka awm mekte chu ngaihthah theih an ni lo, a ti.

Lyngdoh chuan Assam nena ram inchuh thubuai an neih chungchangah state pahnihte chu Congress party rorelna ve ve a nih avangin thubuai chu chinfel thuai an phut thu a sawi.