Silchar-ah passport office hawn tum

Guwahati-a Regional Passport Office chuan kar kal ta Inrinni khan Silchar-ah ni hnih awh tur, passport mela a buatsaih a, Cachar, Karimganj leh Hailakandi district mipuite hman theih turin Silchar-ah passport office hawn thuai an tum thu an tarlang.

Passport mela buatsaihtu, Guwhati passport official team te hi Deputy Passport Officer Dulal Sutradhar-a'n a ho.

January 16 hmaa passport dilna thehlut tawhte chu mela-ah an dilna enfiah an ni a, ni khatah mi 300 dilna enfiah hman an beisei a ni.

"Passport mela hi thla tin vawi khat neih ṭhin tura ruahman a ni a, kan thil tum (target) kan puitlin thei a nih chuan Silchar-a passport office hawn dilna sorkar laipuiah kan thlen ang," tiin Sutradhar chuan a sawi.

Barak valley huam chhunga mipuite hian hun rei tak kal ta aṭangin Silchar-a passport office hawn an lo ngiat tawh a, nikum December 27-a External Affairs Minister, Sushma Swaraj-in Silchar a tlawh ṭum pawh khan passport office hawn a nih tur thu hi a lo puang tawh a ni.