Sorkarin state hmasawnna a ngai pawimawh: Nabam Tuki
Arunachal Chief Minister Nabam Tuki chuan harsatna hrang hrang karah state sorkar chuan state hmasawnna chu a ngaih pawimawh thu sawiin, theihtawp chhuahin a bei mek a ni, a ti.
Kar kal ta Inrinnia Yachuli-a vantlang inkhawmah he thu hi sawiin, mipuite hmasawnna atana hnawthawh chu state sorkar thil tum ber a ni, a ti.
"Hun reilote chhungin India rama state hmasawn nasa ber zingah kan tel a, sorkar laipui pawhin kan state hmasawnna hi min hriatpui a ni. Ngaihdan inanglo tak tak awm mah se hmasawnna atan kan thawhho zel a ngai a ni," a ti.
State hmasawnnaah Yachuli mipuite chu an theih tawk ṭheuha tha thawh tura sawmin, state sorkar chuan an hmasawnna hnathawh chu a thlawp zel ang, a ti.
Vantlang inkhawm buatsaihtu, Toko Puna-in Yachuli-a Divisional Commissioner leh DIGP (Western Zone) office sak a nih loh chungchanga memorandum an thehluh chungchang sawiin, amah hmaa Chief Minister-in kum 1999-a Commissioner leh DIGP (Western Zone) office sakna atana lungphum a phum hnua office sak a ni ta lo chu pawi a tih thu a sawi a, a kaihhruai sorkarin a lo bawhzui tur thu a sawi nghal.
Chief Minister’s Rural Information scheme kaltlangin Tuki chuan Yachuli khuaa kum lama upate hnenah LED TV a sem nghal bawk.
Chief Minister Tuki hi Home Minister Tanga Byaling, Civil Supplies Minister Tirong Aboh, Parliamentary Secretary Punji Mara, Karya Bagang leh Pani Taram te bakah sorkar official te'n an ṭawiawm.