Manipur-a municipal council inthlanah Congress che ṭha

January 11-a Manipur-a municipal council 18 inthlan result chu kar kal ta Inrinni khan puan a ni a, Congress party a che ṭha hle.

Congress party hian Manipur district pali- Imphal West, Imphal East, Thoubal leh Bishnupur district-a local council seat 278-ah seat 108 a la a ni.

Congress party hnaih bertu BJP chuan Manipur inthlanah chanchin chhinchhiah tlak tak siamin, local council inthlanah hian seat 62 a la a, Communist Party of India (CPI)-in seat 2, Lok Janashakti Party-in seat 4 leh, Independent candidate te'n seat 102 an la bawk.

Inthlan result puan hnuah Manipur Pradesh Congress Committee (MPCC) president, Deputy Chief Minister Gaikhangam chuan an party hnehna chan chu lawmawm a tih thu sawiin, Independent-a thlantlinte chu Congress party-in a dahte a nih thu leh independent member tam zawkin Congress zawm an tum thu a sawi.

Hetihlai hian state BJP unit president Thounaojam Chaoba pawhin seat 62 an la thei chu lawmawm a tih sawiin, BJP-in Manipur local body inthlana seat a lak ngai loh hnuah seat 62 an la thei chu hmasawnna lian tak a ni, a ti.

Chaoba chuan Congress party chu sawiselin, municipal council seat 278-a Congress-in candidate 199 chauh an siam thei chu Manipur-a Congress dinhmun hniam tawh zia tichiangtu a ni, a ti.

"Local body inthlana BJP hmasawn-na hi India rama Prime Minister Narendra Modi-a duhna thlithleh mekin Manipur a thleng ta tih tichiangtu a ni a, kum 2017 state Assembly inthlanah rorellai Congress hi kan paihthlak theih ngei ka ring a ni," tiin Chaoba chuan a sawi bawk.

Gaikhangam chuan BJP president Chaoba thusawi chu chhangletin, local body inthlanah hian Congress chuan a dinhmun a sawhnghet zawk a ni, a ti a, kum 2017 state Assembly inthlanah pawh an dinhmun an hum ngei a rin thu a sawi.

Manipur inthlanah hian BJP hian seat a la la ngai lo a, nikum November khan a vawi khatna atan state Assembly bial hniha by-election-ah hnehna an chang a ni.