Assam horticulture aṭanga thlai tharchhuah a pung

Kum 10 chhunga Assam-in horticulture kaltlanga thlai leh thei a tharchhuah chu a letin a pung.

Kum 2014-15 chhunga horti­culture kaltlanga an thil tharchhuah hi metric tonne (MT) nuai 79.28 a tling a, kum 2000-01 khan MT nuai 38.54 a tharchhuak a ni.

State agriculture department thuchhuak chuan horticulture-a hlawhtlinna hi tunlai thiamna leh tech­nology changkang hman vang a ni, a ti.

"Centrally-sponsored project, Horticulture Mission hi hlawhtlinna thlentu pakhat a ni a, mission hnuaiah hian loneitute chuan thlai chin dan kalphung thar leh hmanraw changkang zawk an hmang a ni. Tun hma lamin thlai leh thei enkawlnaah loneitute technology changkang zawk an la hmang lo a, hei vang hian kan thil tharchhuah theih zat kan pha ṭhin lo. Thlai phun leh enkawl dan thar bakah mithiamte'n loneitute nasa takin an puih bawk a, hei hian rah ṭha a chhuah ta a ni," tiin agriculture department-a official pakhat chuan a sawi.

Kum ruk vel kal ta aṭanga horti­culture hlawhtlinna chu agriculture department chuan chhunzawm zel a beisei thu a tarlang bawk.

Kum 2014-15 chhung khan Assam hian thei MT nuai 22.24 a tharchhuak a, thlai MT nuai 51.88 tharchhuakin, spice (chaw hmeh bawlhlo lam chi) MT nuai 5.16 a tharchhuak bawk. Kum 2000-01 khan thei MT nuai 12.41 a thar a, thlai MT nuai 24.71 tharin, spice MT nuai 1.52 a tharchhuak a ni.

Official chuan agriculture department-in alu leh purunsena intodelh tumin theihtawp a chhuah mek tih a sawi.

Assam hian kum 2014-15 khan alu MT nuai 7.84 a thar a, purunsen MT nuai 0.32 a tharchhuak bawk.

"Purunsen tharchhuah zat pun chhanah hian Chief Minister Onion Mission chuan nasa takin tha a thawh a ni," tiin official chuan a sawi.