PM Modi-a'n Kokrajhar tlawh dawn

Prime Minister Narendra Modi chuan nimin khan Sikkim khawpui Gangtok thlawhin, vawiin hian Assam a tlawh leh dawn a, Kokrajhar-a Bodoland People's Front (BPF) buatsaih vantlang inkhawmah a tel nghal ang.

Modi-a lo lawm turin nasa taka inbuatsaih kalpui a ni a, Kokrajhar a Bodoland Territorial Council (BTC) secretariat bulah mi nuai hnih lenna pandal sak a ni a, helicopter tum lailawk theihna tur helipad pathum siam a ni bawk.

Prime Minister-in a tlawh chhung hian Assam Police, CRPF, BSF leh SPG special team te'n venhim hna an thawk dawn a ni.

Modi hian Bodoland Territorial Council mipui te tana hmaṭhatna te a puan rin a ni a, Rajya Sabha MP Biswagit Daimary chuan special package leh ham-
ṭhatna dang Modi hian a rawn thlen a beisei thu a sawi.

Hetihlai hian Assam Chief Minister Tarun Gogoi chuan BPF chu party tenau an nih thu leh BPF te'n an huaihawt, vantlang inkhawma Modi-a lo tel tur hian BJP dinhmun a derthawn zia a tilang a ni, a ti.

Gogoi-a chuan, "He van-tlang inkhawm hi sorkar buatsaih pawh ni lovin BPF party inhmuhkhawmna a ni a, hetiang party inkhawmnaa Prime Minister lo tel hi a dik chiah em ka hre lo a ni," a ti.

"Hetiang inkhawmnaa Prime Minister rawn tel mai hian BJP party dinhmun derthawn zia a ti lang a, BPF nen hian lo thawkho ṭhin tawh mah ila an party programme-ah ka tel ngai chuang lo," tiin a sawi bawk.