PM Modi-a'n Sikkim a tlawh

Prime Minister Narendra Modi chuan Thawhṭanni khan Sikkim tlawhin, organic farming-a state sorkar hlawhtlinna chu lawmawm a tih thu a sawi.

Gangtok, Chintan Bhawan-a a lawmna inkhawmah Prime Minister Modi chuan thu sawiin, organic farming-a state sorkar hlawhtlinna lawmpuina thuziak leh Ministry of Agriculture, Ministry of Commerce, Farmers Welfare leh Agricultural and Processed Food Products Export Development Authority (APEDA)-in organic state-a Sikkim an pawmpuina thuziak a hlan nghal.

Sikkim Chief Secretary, A.K Srivastav chuan Prime Minister lawmna thuchah a sawiah Prime Minister Modi-a'n Sikkim a tlawh avangin a chungah lawmthu a sawi a, India leh rampawnah Modi-a'n Sikkim Chief Minister Organic Mission chu a hriatpui avang leh a fak avangin lawmthu a sawi nghal bawk.

Modi hian Sikkim Organic Mission 'digital logo' a tlangzarh bakah Sikkim organic farming chungchang ziahna lekhabu, "Journey of fully organic state and transforming rural Sikkim" tih a tlangzarh nghal.

Chief Minister Pawan Chamling pawhin Prime Minister Modi-a'n Sikkim a tlawh avanga lawmthu sawiin, Sikkim mipuite tan hun chhinchhiah tlak tak a ni, a ti a, organic state an nih theihna atana Prime Minister Modi-a'n Sikkim Organic Mission a thlawp avang leh India rampawn thlenga a puanzarsak avangin lawmthu a sawi bawk.

Chief Minister Chamling hian Prime Minister Modi hnenah hian an thil phut panga a thlen nghal a, chungte chu:

1) Sikkim mi zawng zawng te scheduled tribe (ST) status pek

2) State Legislative Assembly-a Limboo leh Tamang mite tana reservation siam

3) HH Gyalwa Karmapa hnena Sikkim, Rumtek luh phalna pek

4) Sikkim-a Indian Council of Agricultural Research (ICAR) chu hmarchhak bial tana National Organic Branch-a leh

5) Sikkim loneitute tan Bio-Fertilizer subsidy pek

Prime Minister Modi chuan Sikkim sorkar ngenna chu a lo bawhzui tur thu sawiin, India rampuma agriculture sector tihchangtlun nan theihtawp chhuaha sorkar thawhpui ṭheuh turin kalkhawm mipuite a sawm nghal.