Arunachal Governor thuthlukna siam dan SC-in a enfiah dawn

Arunachal Pradesh Governor J.P.Rajkhowa-a'n Assembly Speaker Nabam Rebia ban phutna motion sawiho a nih theihna atana kumin January 14-a Assembly session neih tur, nikum December 16-a a sawn hma chu Supreme Court chuan dan anga ti a ni em tih a enfiah dawn.

Justice Jagdish Singh Khehar, Justice Dipak Misra, Justice Madan B. Lokur, Justice Pinaki Chandra Ghosh leh Justice N.V.Ramana te awmna constitution bench chuan Governor Rajkhowa-a thutlukna siam dan chungchang hi enfiah a nih tur thu tarlangin, "Governor-in session neih hun a sawn hma chu a dik lo a nih chuan a hnu lama thilthleng pawh a dik lo nghal vek a, chu mi chungchang chauh chu kan ngaihtuah dawn a ni," a ti.

Senior counsel, Kapil Sibal chuan Aruna-chal BJP MLA 11 leh independent MLA pahnihin Assembly Speaker ban phutna motion an putluh chu Governor hnena thlen a nih thu leh, Assembly 'rules of bussiness'-in a sawi angin state assembly secretariat-a thehluh a nih loh thu a tarlang.

Sibal chuan Aruna-chal-a eptu party, BJP MLA leh independent MLA pahnih te motion putluh vang ringawtin Assembly session neih hun hi a duh angin a ruat thei lo tih a sawi a, Assembly session chu state sorkar pawmpuinaa koh tur a ni, a ti.

Governor Rajkhowa hian nikum December 9-a thuchhuah a siamah kumin January 14-a session neih tur chu December 16-a sawn hmain, Speaker laka 'no confidence motion' putluh chu ngaihtuah hmasak ber a ni ang, a ti.

Supreme Court con-stitution bench hian Aruna-chal-a rorellai Congress sorkar leh Gover-nor Rajkhowa inkara thubuai awmte leh Congress MLA lungawi lote chungchanga petition pathum a ngaih-tuah mek a ni.