Assam Assembly inthlanah AIUDF mal ṭan dawn

Kumina Assam Assembly inthlan neih turah Badaruddin Ajmal-a kaihhruai All India United Democratic Front (AIUDF) chuan mal ṭan a tum thu a puang.

Senior AIUDF hruaitu chuan he thu hi sawiin, an party chuan Congress leh Bharatiya Janata Party (BJP) duhlote ai a awh dawn a ni, a ti.

"Mal ṭan tum mah ila tun dinhmunah chuan third front party siam lelh siam loh tur chungchangah eng mah kan sawi thei rih lo a, political party dangte'n third front siam hi an hreh tlangpui a ni. Hei vang hian party mala inthlan hmachhawn turin kan inbuatsaih mek a ni," a ti.

Seat 126-ah seat eng zat nge candidate thehchhuah an tum tia zawhna chu chhangin, "Kan party hruaitu, Badaruddin Ajmal chu state puma vantlang inkhawm hrang hrangah a tel avangin a la buai rih a, February thlaah hemi chungchangah hian thutlukna kan siam theih kan beisei," tiin AIUDF senior hruaitu chuan a sawi.

Congress-in AIUDF thawhpui an tum loh chung­chang chu sawifiahin, AIUDF hruaitu chuan thawhho chu Congress party rawt chhuah hmasak a ni, a ti.

"Chief Minister Tarun Gogoi chuan BJP party lo zawng ṭanrual chungchang a lo sawi tawh a, keini pawhin hei hi kan tuipui hle a ni. Mahse kan ṭanrual dawn chuan thil phut kan nei a, thawkho tura thuthlung kan siam dawn a nih chuan seat 53-ah candidate thehchhuah kan phut bakah kan thuthlung chu vantlang mipui hriata puanzar kan duh a ni. Mahse tunah Congress party chuan min phatsan tawh a, Dispur-ah BJP-in thuneihna a chang a nih chuan Congress mawhphurna a ni ang," tiin a sawi.