Garo Hills buai chhanah Mukul-a'n Assam helte a puh

Meghalaya Garo Hills-a helte pawikhawihna vanga buainaah Chief Minister Mukul Sangma chuan a mawhphurtuah Assam helpawl, United Liberation Front of Assam (ULFA) leh National Democratic Front of Bodoland (NDFB) helte a puh.

Mukul chuan Thawhṭanni khan New Delhi-ah Union Home Minister Rajnath Singh hmuin he thu hi a sawi a, Garo Hills-a dan leh thupek lekkawh tur leh venhimna pe turin paramilitary force company ruk dahbelh a ngen nghal.

Nikuma ULFA leh NDFB helte'n Assam-a buaina an thlen avangin Garo Hills-a paramilitary force company ruk te chu lakchhuah an ni, a ti a, hei vang hian state sorkar chuan Gar Hills-ah hian central paramilitary force company 18 dah turin sorkar laipui a lo ngen tawh ṭhin a ni, a ti.

Union Home Minister Singh chuan helte beilet kawngah state sorkar chu sorkar laipuiin theihtawp chhuaha ṭanpui a tum thu a lo hrilh a, paramilitary force an dil belh pawh sorkar laipuiin a ngaihtuah mek a ni, a ti.

Minit 20 dawn an in-khawmnaah Mukul chuan helte beihlet kawnga state sorkar hmalakna chung-chang Singh hi a hrilh bawk a, tun hnaia Assam sumdawng pasarah rukbo an nih dan leh Intelligence Bureau officer thah an nih dante pawh a hrilh nghal.

Singh chuan para-military force dah belh dilna chu a lo bawhzui tur thu sawiin, helte beihlet kawngah chhawr ṭangkai thiam turin Meghalaya sorkar chu thurawn a pe nghal.