Court hmaah Tarun Gogoi-a inlan

Assam Congress Minis-ter hlui, tuna BJP hruaitu Himanta Biswa Sarma-a'n inpuh hmingchhiatna thubuai a siamsak avangin Assam Chief Minister Tarun Gogoi chu Thawhṭanni khan Kamrup (Metro) district, Civil Judge court hmaah a inlan.

CM aiawhtu, Assam Advocate General AC Buragohain chuan Himanta Biswa Sarma-a'n news report behchhana Gogoi-a laka inpuh hmingchhiatna thubuai a thehluh chu inpuh hmingchhiatna a nih loh thu sawiin, a chhanletna atan leh ngaihdam dilna atana hun a dil nghal.

Court chuan hemi chung-chang hi February 8-a ngaihtuah zui atan a dah. Gogoi hian Sarma hi Saradha scam leh Louis Berger scam-a inhnamhnawihah a puh a ni.

Himanta Biswa Sarma aiawh hian senior advocate, Devajit Saikia a inlan.

Court aṭanga a chhuah hnuah Chief Minister Gogoi chuan court-in a koh anga court hmaa inlan a ni tih a sawi a, tumah dan chungah an awm lo a ni tih hi ka thuchah a ni, a ti.

Chief Minister hi a fapa, MP Gaurav Gogoi leh minister te bakah Congress party worker ṭhahnem takin an ṭawiawm.