MHA-in panel hnenah thla khat hun pek belh

Ministry of Home Affairs (MHA) hi Assam-a leilung fate hum­halhna pek dan tur chung­chang ngaihtuah a, rawtna siam tura a ruat panel chu report thehlut turin thla khat dang hun a pekbelh. 

Nikum July thlaa MHA in a din, panel hi Justice (Retd) Biplab Kumar Sharma chuan hoin, member 10 chuang an awm a ni.  He committee hi 1985 Assam Accord Clause 6 behchhana din an ni. Panel member palite chuan tunkar tir lam khan home minister Amit Shah hmuin, an hnathawh leh hmasawn dante an hrilh a ni. 

Home Minister hnen­ah hian report thehlut turin ni 15 hun pekbelh turin an dil nghal bawk. Mahse Amit Shah an hmuh hnuah MHA chuan thla khat hun a pek belh ta zawk a ni. Home ministry in hriat­tirna a tihchhuahah, committee hian Assam sorkar hnuaiah Assam leilung fa dik takte tana sorkar hnaa an chanpual dah tur chinte a ngaihtuahin rawtna hi a siam dawn tih a sawi. Committee member-te hian stakeholder hrang hrangte pawh an kawm kual tawh a ni.