Ruihhloa sumdawng nen inzawmna neiah Meghalaya CM puh

Meghalaya-a eptu pawl, Trinamool Congress (TMC) hruaitu leh chief minister hlui, Mukul Sangma chuan chief minister Conrad K Sangma chu Mizoram leh hmarchhak hmun danga ruihhloa sumdawnnaa hotu,'drug kingpin' Henry Lalremsanga nena inzawmna ṭha tak neiah a puh.

Thawhlehnia Assembly-a ruihhlo hluar zel chungchanga motion put luh an sawihonaah, Mukul chuan kum 2013, April thlaa media report rawn sawi chhuakin, pseudoephedrine tablet, cheng vaibelchhe 6 hu man kaihhnawiha police-te'n an man, Henry Lalremsanga chu CM Sangma nen inzawmna ṭha tak an nei a ni, a ti. Kum 2021, September thlaa Delhi-a Andaz by Hyatt-a fashion show neihnaa CM Sangma-te nupa leh Henry-te ṭhuthona thlalak pawh a phawrh lang a, hetianga mi pawimawh tak tak kal khawmnaa a tel theihna tur pawh hi Chief Minister Office ruahman niin a puh. Hepa lak aṭanga inthiarfihlim turin CM chu a ngen tih sawiin, a nihna dik tak a hre lo em ni, tiin a zawt leh bawk.

TMC hotu chuan media report sawi chhuak lehin, Henry chu kum 2003 khan Mizoram aṭangin Delhi-ah chhukin, bank hrang hrangah pawh a lo thawk tawh a ni. A hnuah MLA hlui Ashok Ahuja fapa, Arvind Ahuja nen inthurualin dan loa sumdawnna an kalpui a, Ahuja motor aṭang hian pseudoephedrine tablet strip 2,52,680 man niin a driver Manish chu man a ni, hemi kaihhnawihah hian Ahuja leh Henry-te pawh man an ni, a ti. Police-te chuan ruihhlote hi Mizoram bakah hmarchhak state dang leh Myanmar ramah an supply ṭhin niin an puh tih Mukul chuan a sawi.

CM Sangma chuan Mukul puhna hi thil awm lo tak a ni tia chhangin, nitin mi hrang hrang thla a lakpui fo a, thlalakpui diltute chu a lo hnar ngai lo tiin, thlalak ringawt chu thutlukna siamna tur a ni lo a ti a, TMC hruaitu chuan thil a la vung mai mai niin a puh ve thung.