Manipur: Police form haa mi that ṭhin an awm niin sawi

Manipur additional home secretary, Maharabam Pradeep chuan Imphal police headquarters-a press mite a kawmnaah police anga inthuam leh CDO uniform ha chunga pawikhawih ṭhin an awm thu sawiin,"CDO leh Police lem changin mi tute emaw chuan khawlai an fang a, pawi an khawih ṭhin. Mi vau, mi thah leh pawisa dil chhuahte chingin, sorkar tan hian an hnawk hle a ni," tiin a sawi.

Pradeep chuan state-in buaina nasa tak a tawh mek karah hetianga che ṭhinte chu a dem thu a sawi a,"Police-te chuan an theihtawpin boruak muanawm a awm leh theihna tur atan hma an la a, mahse, hetianga police lem changa pawi lo khawih ṭhinte hian police-te hmalakna a thai chhe vek a ni. Heng mite zawng chhuak a, hrem tur hian kan police-te pawhin hma an la ve zel bawk," a ti. Pradeep hian inrawkna leh invauna a hluar thu leh complaint an dawn tam thu a sawi bawk.

September 16 khan Manipur police leh security force-te chuan sipai uniform anga inthuam mi panga an man a, an kutah ralthuam man a ni bawk. An mi mante chungah hian dan anga na taka hma an lak tur thu leh, hrem an nih tur thu Manipur police thuchhuahah tarlan a ni.