Manipur sorkarin sipai thah chungchang chhui tur panel din

Manipur sorkar chuan Imphal-a Indian Army sipai, Sepoy Serto Thangthang Kom thah a nih chungchang chhui turin high-level one-man inquiry commission a din.

Chief minister N Biren Singh-a'n sipai thah tak chhungte hnenah tualthattute chungah action na tak lak a tiam hnuah, sorkar chuan panel hi a din a ni.

Governor Anusuiya Uikey chuan hemi chungchangah hian thuchhuah siamin, Serto Thangthang Kom thah a nih dan chhui chiang turin Inspector General of Police (Zone 1), Manipur-a IPS, Themthing Ngashangva chu ruat a ni tih a sawi a, order tihchhuah aṭanga thla khat chhungin report theh lut tura tih a ni bawk.

Sepoy Serto Thangthang Kom, kum 41 mi hi kar liam ta Inrinni khan Tarung, Imphal West-a a chenna in aṭangin misual tu tih hriat lohte'n ralthuam nena vauin an hruai chhuak a ni. A tuk, Pathianni zingah a ruang hi an in aṭanga km 14 vela hlaah hmuh a ni a, a taksaah silaia kahna hmuh a ni bawk. Kom hi medical leave-a ni 15 chawlh hmanga haw niin, Thawhṭanni khan Leimakhong Military Garrison-ah in-report leh tur a ni. He tualthahna thleng vang hian tribal hnamte an lungawi lo hle a, lungawi lohna lantirin nawrh pawh an lo huaihawt tawh a ni.