Tripura-in e-cabinet kalpui dawn

Tripura Council of Ministers ṭhu khawm chuan civil secretariat-a file leh document reng reng chu lehkha puan hmang loa kalpui vek tawh tur tiin an rel. Hna kalpui dan tharah hian official thil reng reng chu digital-a tih vek tawh tur a ni dawn niin Cabinet thupuangtu, Sushanta Chowdhury chuan thu thar lakhawmtute a hrilh.

Nilainia cabinet minister ṭhu khawm hi chief minister Dr. Manik Saha chuan a ho a ni. Chowdhury chuan, "Lehkha puan hmang loa sorkar thil reng reng kalpui dan tura hmalakna turte chu a kip a kawiin kan sawi. File leh document-te digitalised vek chu tun aṭanga rei loteah hman ṭan nghal a ni ang. Chief minister Dr. Manik Saha hian kan state tana E-cabinet kalpuina tur hi mumal taka hawnna a la nei ang," tiin a sawi. Chowdhury chuan sawi zawm zelin,"Lehkha puan siamna hmanrua ber chu thingkung a ni tih kan hria a, prime minister Narendra Modi pawhin lehkha puan siam nana thing kih a tlem zawk theihna turin state zawng zawngte chu hnathawhna atan lehkha puan hmang tlem turin a hriattir tawh bawk. Lehkha puan aiah tablet leh electronic hmanraw dangte chu hman uar kan tum a ni," a ti.

Cabinet meeting chuan tribal welfare department hnuaiah tribal development atana special scheme tlangzarh thuai an tum thu a sawi bawk."Inthlan hmaa manifesto-a kan neih angin, he scheme atan hian Rs. vbc 30 ruahman theih tura beisei chhin a ni. He project Chief Minister Tribal Development Mission tih hming kan phuah hian tribal mite tan an nunphung chawikanna tur bakah, eizawnna te, thiam thil neih kawngah te, zirna, hriselna leh tui in tur thianghlim neihna kawnga harsatna an tawhte ngaihtuah a, chinfelsak a tum dawn a ni. Tribal welfare department te'n heng hamṭhatna dawng thei tura inziah luhna tur an buatsaih thuai ang," tiin Chowdhury chuan a sawi bawk.

Tripura hian e-cabinet hi an kalpui thei a nih chuan India rama a palina tur an ni dawn a, anni hmaah hian Uttar Pradesh, Uttarakhand leh Arunachal Pradesh te chuan an lo kalpui tawh a ni.