Sept. 30-ah Sohra International half marathon nei dawn

Meghalaya State Olympic Association (MSOA) working president, John F. Kharshiing kaihhruaina hnuaiah Thawhlehni khan Sohra International Half Marathon organising committee chuan meeting neiin, 2nd Sohra International Half Marathon 2023 chu September 30, 2023-a neih turin an rel. Marathon neih tur hi Athletics Federation of India hriatpui leh enpuina hnuaia neih tur a ni.

Sohra International Half Marathon vawi hnihna neih tur pual hian Main secretariat conference hall, Shillong-ah organising committee te chu an ṭhu khawm a ni. Committee member-te chuan kum hmasa lama an lo buatsaih tawh aṭanga an hriatte sawiin, hmasawnna an neihna lai turte an sawi bawk. Nikuma buatsaih a nih khan mi 700 an tel thu leh, kumin atana online application an dawn tawh chu 3,000 a tlin tawh thu an sawi bawk.

Meeting-ah hian organising committee official leh sub-committee te chuan marathon tlanna tur, an ṭanna tur hmun thum leh a tawpna tur te a hmun ngeia tlawh chhuah vek an rel. Registration tihtawp hnuah organising committee chuan Laitsohpliah aṭanga Sohra, Mawsmai thleng September 30, zing 6 - 9 thleng kawng khar a nih tur thu chu marathon tel turte leh mipui bakah, tourist te hriat tur atana puang darh leh turin an rel bawk.

Superintendent of Police, East Khasi Hills District, Sylvester Nongtnger, Joint Director of Health Service, P.N Chyne, Sohra Civil Subdivision Assistant Commissioner, J M Umdor; P.B War Nongbri, Assistant Director of the Department of Sports and Youth Affairs; leh Finely L Pariat, Sohra Run Organising Secretary leh MSOA General Secretary ni bawk bakah sports leh police department hotu eng emaw zatin meeting hi an telpui a ni.