CM Zeliang-a'n in-kalpawh kawngpui tha neih a duh

Nagaland Chief Minis­ter T.R. Zeliang chuan hmar­chhak bialin infarstruc­ture tihchangtlun a mamawh zia sawiin, hmarchhak bial hmasawn nan inkalpawhna kawngpui ṭha leh rela inkalpawh changtlung tak neih a duh thu a sawi.

“India-Japan Partnership Towards Meeting the Challenges of Infrastructure Development in India’s North East” tih thupui hmanga Thawhlehnia Dimapur, Hotel Acacia-a sawihonaah Zeliang chuan he thu hi a sawi a, Asia chhim chhak lam ramte leh hmarchhak state te kawngpui leh rela inkalpawhna siam tur chu Moreh aṭanga Imphal paltlanga Nagaland-a luhtir a rawt bawk.

Zeliang chuan hmarchhak bial thil mamawh pawimawh leh chu electricity a ni, a ti a, power-a intodelh bakah a semdarhna lam tihchangtlunte chu thil dah pawimawh hmasak ngai a ni, a ti. Power sector-a harsatna sutkian nan sawihonaa telte chu rawtna siam turin a ngen nghal.

Nagaland-Myanmar ramri hung chungchang chu an tan thil pawimawh ber a ni lo tih sawiin Nagaland Chief Minister chuan ramri hrul chengte tihhmasawn nan ramri hnaihah inkalpawh kawngpui ṭha an mamawh zawk a ni, a ti.