Rorelna dik lo kalpuiah Modi-a'n Congress sorkar a puh

Prime Minister Narendra Modi chuan Thawhlehni khan Kokrajhar-a thu sawiah Assam-a rorellai Congress sorkar chu kum 15 chhung rorelna dik lo kalpuiah a puh a, hei vang hian Assam Congress sorkar chuan central-a thla 15-a upa, BJP kaihhruai sorkar chu a sawisel ngam tur a ni lo, a ti.

"Kum 15 chhunga thil ṭha ti thei lote khan thla 15 chhungin thil engkim tifel vek turin min beisei a ni," tiin Modi chuan Kokrajhar, Bodofa Nagar-a Bodoland People’s Front (BPF) rally buatsaihah a sawi.

"Congress chuan thla 15 chhung Prime Minister hna ka chelh chhunga ka hnathawhte tarlan phut loin Assam-a kum 15 ro an rel chhunga an hnathawhte chipchiar takin tarlang zawk rawh se," a ti.

Congress party hruaitute chu sawiselin Modi chuan, "Congress hruaitu, Manmohan Singh a zawna term hnih Prime Minister hna a chelh chhung khan Congress party hian Assam tan eng hna nge a thawh, state Congress-in kum 15 ro a rel chhungin eng hna nge a thawh?" tiin zawhna a siam.

"Assam tana ka thil tum pathum chu hmasawnna, hma-sawnna leh hmasawnna a ni. Hmasawnna chu BJP kaihhruai, NDA sorkar thil tum ber a ni, hun kal taa thu kan lo tiam tawhte chu bawhzui zel a ni anga, hmasawnna project la peihfel lohte pawh chhunzawm zel a ni ang," a ti.

Prime Minister Modi hian Assam phai ruama cheg, Karbi mite leh tlangrama cheng, Bodo mite hnena Scheduled Tribe (ST) status pek tiam mah se sum lama ṭanpuina tur erawh a puang lo.

Bodoland Territorial Council (BTC) huam chhunga mipuite hma-sawn nan BJP chuan theihtawp chhuaha a beih a tum thu Modi chuan a sawi bawk.

"India rama harsatna zawng zawng chinfelna chu hma-sawnna a ni a, hmarchhak bial mamawh hmasa ber chu infrastructure lama hmasawnna a ni. Motor kawngpui a ni emaw, rel kawng emaw lawng hmanga inkal-pawhna ni rawh se, sorkar laipui chuan a tihchangtlun nan Act East policy a duang chhuak a ni. Kum 2022-a India zalenna hmuh champha vawi 75-naah chuan India ram mipui zawng zawngte chu chatlak loa power supply pek ka tum a, hei hi ka lo suangtuah ṭhin a ni. Hmarchhak
ṭhalaite chu Delhi Police-a la turin ka hriattir tawh a, hnalakna hi kalpui ṭan tawh a ni," tiin Prime Minister Modi chuan a sawi.

Modi chuan Kokrajhar-a Central Institute of Technology (CIT) chu kum khat chhunga 'deemed university status' pek a nih tur thu a puang bawk a, mipui hman theih tura Rupsi airport cheiṭhat a nih tur thu leh BTC huam chhunga mipuite tan Silchar thleng Silchar Kanchenjunga Express rel tlantir a nih tur thu a sawi bawk.