SC thutlukna Tuki-a tan a lawmawm

Arunachal Pradesh-a BJP leh rorellai Congress MLA lungawi lote'n Chief Minister Nabam Tuki kaihhruai sorkar paihthlak an tum chung-changa Supreme Court-in thutlukna a siam lai-lawk chu Tuki-a tan thu lawmawm lam a ni.

Supreme Court chuan Arunachal politics buaina chu chinfel vek a nih hma chuan Chief Minister Tuki chuan a hna a chelh chhunzawm zel ang a ti.

Arunachal BJP leh Congress MLA lungawi lote'n rorellai Congress sorkar paihthlak an tum chungchang hi Thawh-lehni khan Justices Jagdish Singh Khehar, Dipak Misra, Madan B Lokur, Pinaki Chandra Ghosh leh NV Ramana te awmna Supreme Court constitutional bench chuan a ngaihtuah a ni.

Nikum December 16-a Governor JP Rajkho-wa-a'n session a koh ṭuma, Assembly Speaker aṭanga paihthlak tak, Nabam Rebia chuan House-a amah fiah tura rawtna a siam chu hnawlin, Congress MLA lungawi lote chu state politics buai chhan a ni, a ti a, hei vang hian heng Congress MLA te an MLA nihna hlihsak tawh chu pawmpui zawk turin Court a ngen.

Rebia-a counsel, Fali Nariman chuan President rule-a Arunachal dah tumna chu a thlawp loh thu tarlangin, Congress MLA te an MLA nihna hlihsak chungchang chu chinfel a nih hma chuan Rebia-a'n House-ah fiah a duh loh thu a tarlang.

Hetihlai hian Supreme Court constitutional bench chuan Governor Rajkho-wa-a'n kumin January thlaa Assembly session neih tur, nikum December 16-a a sawn hma chung-chang chu Thawhṭan-ni khan ngaihtuahin, Governor chuan dan ang thlapin thil a ti em tih a enfiah tur thu a tarlang.