Remna zawnga inbiaknaah sorkar laipuiin thu thar nei lo

Meghalaya sorkar chuan Garo National Liberation Army (GNLA) leh Hynniewtrep National Liberation Council (HNLC) helte chu rem-na zawnga inbiakna neih-pui duh mah se hemi chung-changah hian sorkar laipui chuan thu thar a nei lo.

State sorkar senior official chuan sorkar laipuiin helte hi inbiakna neihpui remti se chuan Garo Hills huam chhung-ah remna leh muanna a thlen tawh a beisei thu a sawi.

"GNLA helte nena remna zawnga inbiakna ruahman turin sorkar laipui chu nikum khan lehkha thawnin kan ngen tawh a, mahse sorkar laipui chuan inbiakna hun a nih loh thuin min lo chhang a ni," tiin official chuan a sawi.

Sorkar laipui chuan ANVC, ANVC-B leh UALA helte chu remna thuthlung lo ziahpui tawh mah se Garo Hills boruak a muanawm phah lo a, hei vang hian Garo Hills huam chhunga helpawl lian ber, GNLA te chu remna zawnga inbiakna neihpui a ngai a ni, tiin state sorkar official chuan a sawi.

"State sorkar chuan GNLA nena inbiak a
ṭul tih a hria a, mahse dan pawna hnawl tawh, helpawl an nih avangin be tur chuan sorkar laipui phalna neih hmasak a ngai a ni," a ti.

Official chuan HNLC helte be turin state sorkar chuan sorkar laipui chu nikum khan a ngen tawh thu a sawi bawk a, mahse sorkar laipui aṭanga chhanna an dawn loh thu a sawi.

"Garo Hills-a helte'n inbiak an hreh loh thu hi state sorkar pawhin a hriatpui a, mahse sorkar laipui pawmpuina kan neih loh chuan hma kan la zui thei lo a ni," tiin a sawi bawk.