Assam-ah hripui vanga thi 151 tling tawh Hri kai hmuh thar zingah DGP a tel

Hmarchhak state zinga hri kai tamna leh hri vanga thi tamna ber state, Assam-ah Thawhṭanni khan hripui vangin mi paruk an thih belh leh a, Covid-19 vanga thi hi mi 151 an tling tawh. Hri vanga thi mi parukte hi kum 26-70 inkar an ni a, 3 Kamrup Metropolitan district mi pathum bakah Sonitpur, Karimganj leh Dibrugarh mi pakhat ṭheuh an ni. 

Thawhṭanni khan Assam-a hian hri kai hmuh thar mi 2,900 an awm leh a, hri kai hmuh tawh hi mi 61,737 an awm tawh. Hri kai hmuh thar zingah hian Director general of police (DGP) Bhaskar Jyoti Mahanta pawh a tel. Chief Public Relations Officer of Assam Police Rajib Saikia chuan DGP hi Pathianni khan khawsik leh khuh a nei a, Thawhṭanni khan test niin a result a positive tih hriat a ni ta tih a sawi. Hri a kai tih riat a nih veleh in lamah a inkhung hrang nghal tih a sawi bawk. DGP driver pawhin hri hi a kai tel bawk a ni. 

Assam Police zingah mi 2,259 chu Covid-19 an kai tih hmuh chhuah a ni tawh a, an zinga 1,734 chu enkawl dam an ni tawh thung. A tam zawk hian an hna pawh an thawh chhunzawm tawh bawk a, hetih lai hian hripui vangin police parukin nunna an chan tawh. State chhunga hri kai an pun belh zel avangin hri kai, taksa lama harsatna nei hran lote chu sorkarin kaihhruaina a siam zawm chunga in lama an inenkawl phalsak an ni. Health minister Himanta Biswa Sarma chuan Guwahati khawpui bikah, hri kai in lama inenkawl duhte chu sorkarin pulse oximeter leh damdawi mamawhte a thlawnin a tumsak zel dawn tih a puang.