Sikkim greenfield airport nakkumah Peih fel dawn: DoNER Minister

Development of North Eastern Region (DoNER) Minister, Jitendra Singh chuan Sikkim-a greenfield airport siam mek chu nakkumah peihfel hman a beisei thu Thawhlehni khan a sawi.

DoNER leh North Eastern Council (NEC) project hrang hrang kalpui mekte enpui turin DoNER Minister Singh hian Sikkim a tlawh a, Gangtok-a chan-chinbu mite nena an in-khawmnaah greenfield airport chungchang hi a sawichhuak.

"Pakyong-a greenfield airport hi revised cost, cheng vaibelchhe 605.59 sengin kum 2017-ah peihfel hman kan beisei a ni," a ti.

Kilometre 45-a thui, Sevoke-Rangpo rel kawng pawh cheng vaibelchhe 4,190 senga siam a nih tur thu Singh chuan a sawi a, rel kawngah hian leiverh 14 leh lei 28 a awm tur thu a sawi.

DoNER Ministry-in Sikkim-a project a kalpui mek chungchang sawiin, Non Lapsable Central Pool of Resources (NLCPR) kaltlangin Sikkim-ah cheng vaibelchhe 487.91 senna, project 183 peihfel tawh a ni a ti a, cheng vaibelchhe 721.89 senna tur, project 41 chu kalpui mek a ni, a ti.

Sing chuan North Eastern Council (NEC) hnuaiah Sikkim-ah hian cheng vaibelchhe 321.33 senna tur, project 54 chu kalpui mek a ni tih a sawi bawk a, heng aṭang hian cheng vaibelchhe 218.54 chu pekchhuah tawh a ni, a ti.