Tripura-ah IIIT din dawn

Tripura Higher Education Minister Tapan Chakraborty chuan state ṭhalaite'n hna hmuh nghal theihna tur zirna an zir theih nan Indian Institute of Information Technology (IIIT) din an tum thu Thawhlehni khan a sawi.

IIIT dinna atan hian state sorkar chuan Bodhjungnagar-ah ram acre 50-a zau a neih tawh thu sawiin, Agartala hmar lamah kilometre 25 chauha hla a nih thu a sawi.

"Information Techonology ṭhang chho mek mila kan nun kan her rem theih nan ṭhalaite chu hna hmuh nghal theihna tur, zirna lam kan ngaihtuahsak a ngai a ni. IIIT dinna atan hian cheng vaibelchhe 128 ruahman a ni," tiin Chakraborty chuan a sawi.

IIIT an hawn tur chu Oil and Natural Gas Corporation (ONGC), Northeastern Electric Power Corporation (NEEPCO) leh National Building Construction Company (NBCC) te chuan an corporate social responsibility (CSR) katlangin thawhpui an duh nghal thu Tripura Education Minister chuan a sawi bawk a, IIIT hawnna atan hian Tripura sorkar leh Human Resource Development (HRD) ministry chuan kar kal ta khan New Delhi-ah thuthlung an ziah thu a sawi.

Tripura Higher Education De-part-ment-a official chuan HRD ministry hian not-for-profit pub-lic-private partnership (N-PPP) kalphung-in IIIT 20 hawn a tum thu a sawi.

"HRD Ministry-in IIIT 20 a hawnna atan hian sorkar laipui chuan senso 50% a tum anga, state sorkarin 35% leh Public Sector Undertakings (PSU) te'n 15% an tum ang tiin rel fel a ni tawh a ni. Mahse hmarchhak state te chu ngaihhnathiam niin, sorkar laipuiin 60% a tum ang a, a bak zawng chu PSU te'n an tum ang," tiin official chuan a sawi.

Agartala bakah hian hmarchhak bialah IIIT hi Assam khawpui, Guwahati leh Manipur, Senapati district-ahte hawn a ni bawk ang.