Cachar Cancer Hospital-in sorkar ngaihsak a phut

Kum 1994-a Assam Chief Minister Hiteswar Saikia-a'n a lo hawn tawh, Silchar-a Cachar Cancer Hospital and Research Centre chuan nasa takin hma sawn mah se an sum dawn tur an dawn loh avangin sorkar ngaihsak a phut.

Hosipital chairman, Dr. Chin-moy Choudhury, general sec-retary Prof. D P Roy leh Cachar Cancer Hospital Society director Dr. Ravi Kannan te chuan thuthar lakhawmtute an kawmnaah hospital hlawhtlinna leh hnathawh ṭhat zawng zawng chu hospital hotu, doctor, paramedical staff, nurse leh thawktu hrang hrang te thawhrimna vang a ni, an ti.

Dr. Ravi Kannan chuan, "Har-satna tam tak kan tawk a, mahse damdawiin hmasawnna atan chuan ruahmanna mumal tak nen heng harsatna te hi paltlang a ngai a ni," a ti.

"Mipuite tana hna thawh hi a pawimawh ber a, a hma chuan damlo zaa 70 te chu senso tam lutuk avangin inenkawl zui lovin an rawn kal nawn ngai lo ṭhin a, kum 2012 aṭang erawh kha chuan an senso chu engzat pawh ni se enkawlna awm thei ang ang an dawn zawh hma chu chhhuahtir an ni ngai tawh lo," tiin a sawi bawk.

Senso awm lova in lama enkawlna 'home care programme' pawh kalpui a ni a, nikum khan in 592 an tlawh chhuak hman a ni. Lala leh Karimganj-ah te Telemedicine Treatment Centre dah a ni a, Haflong, Jiribam leh Dhar-managar-ah te pawh dah tum a ni.

Cachar Cancer Hospital ah hian khum 84 a awm mek a, khum 100 dah thuai tum a ni. Assam University-a Biotechnology Department nena thawk dunin research centre pawh peihfel ṭep a ni tawh bawk.

Cachar Cancer Hospital hian hlawhtlinna ṭha tak nei mahse Dr Kannan chuan sum harsatna hi hmasawnna daltu a ni tih a sawi a, "Sorkar atangin sum hmuhna tur mai a awm lo a, eng cancer hospital mah hi linear accelerator leh nuclear medicine centre tel lo chuan a famkim thei lo. Hemi kan dilna pawh state sorkarin a la pawm thei lo a, oncology department hawng tura remtihna nghah mek a ni," a ti.

Hospital hmasawn nan hian cheng vaibelchhe 60 vel mamawh a nih thu a sawi bawk.

Kannan chuan Cachar Cancer Hospital chu Tripura sorkarin referral centre-ah a pawm a ni tih a sawi a, kum 2015 a damlo mi 2996 admit zinga mi 1555 chuan cancer an vei tih hian cancer natna tam zia a tilang chiang hle tiin a sawi bawk.