Gogoi-a'n special category status chhunzawm a ngen

21st January, 2016

Prime Minister Narendra Modi-a'n Assam a tlawh chu Chief Minister Tarun Gogoi chuan sawisel zui nghalin, Modi chuan mipui beisei a pha lo a ni, a ti.

Hemi rual hian Gogoi chuan Assam leh hmarchhak state dangte 'special category state status' chu chhunzawmsak turin Prime Minister Modi a ngen nghal.

Gogoi chuan Thawhlehni khan press conference-ah he thu hi a sawi a, Modi chuan Assam tana thil pawimawh tak tak puan a nei lo a ti a, Bodoland Territorial Autonomous Districts (BTAD) huam chhunga mipuite'n 'special package' an beisei laiin Modi chuan a puang lo a ni, a ti.

Modi chuan thu a sawiah tuilian avanga Assam-a harsatna thleng
ṭhin chungchang pawh a sawi lo, tiin Gogoi chuan a sawi bawk a, Assam-a National Register of Citizen (NRC) update kalpui mek leh rampawn
aṭanga pemlutte chungchang pawh engmah a sawi lo a ni, a ti.

"Modi chuan thuchah a sawiah Prime Minister hlui, Manmohan Singh kaihhruai, UPA sorkar a sawisel a, UPA hun lai khan Assam chuan a ṭhatpui zawk a ni. UPA hun laia Assam-in hmasawnna a hmuhte leh NDA sorkar chhunga hmasawnna a hmuhte chu a chipchiarin kan tarlan theih thuai ka beisei. Central fund kan hmanral dan chu chipchiar taka tarlang turin Assam sorkar chu a inpeih reng a ni. Sorkar laipui chuan Special Category States chu kalpui chhunzawm a, funding pattern hlui kha a hman leh a ngai a ni," tiin Chief Minister Gogoi chuan a sawi.

Gogoi chuan Prime Minister Modi hnena hian lehkha thehlut nghalin, an thil phutte a thlen a, special category status a chhunzawm a ngen bakah sorkar laipuiin scheme a tihtawp tawhte chu chhunzawm leh turin a ngen bawk.

"Assam chuan tun hnaiah tuilian avanga chhiatna nasa tak a tawk a, mahse Jammu & Kashmir leh Tamil Nadu hnena sorkar laipuiin ṭanpuina a pek ang chu kan hmu ve lo, Assam tuilian avanga chhiatna thlengte hi 'national disaster'-a puan ka phut a ni," a ti.

Assam Chief Minister chuan skill development centre din nan cheng vaibelchhe 1350 scheme kalpuina tur sorkar laipuiah ngen a ni a, mahse chhanna an la hmuh loh thu a sawi.