AAPSU-in Chakma-Hajong refugee survey nei turin ngen

All Arunachal Pradesh Students’ Union (AAPSU) chuan Arunachal Pradesh sorkar hnenah an state chhungah Chakma-Hajong refugee awm zat dik tak hriatchian a nih theihna atan survey nei turin a ngen. 

Zirlai pawl chuan Legislative Assembly neih zawh taka chief minister Pema Khandu-an Citizenship (Amendment) Act siam a nih hnua an state-a Chakma-Hajong refugee te dinhmun tur a sawichhuah chu lawmawm an tih thu a sawi bawk. CM hian CAA hian Arunachal Pradesh a huam ve dawn lo a, hei vang hian an state chhunga refugee-te chuan India khua leh tui nihna an dil ve thei dawn lo tih a sawi. 

Hei bakah hian CAA pass a nih hmaa Chakma-Hajong refugee ten khua leh tui nihna pe tura an lo dil tawhna pawh uluk taka enfiah a nih  hnuah sorkar chuan a hnawlsak bawk a ni. AAPSU chuan state sorkar hnenah Inner Line Permit (ILP) system chu khauh zawka kalpui turin a ngen bawk. Zirlai pawlin Operation Clean Drive (OCD) a neih thawh khatnaah state chhungah ILP dik tawk lo hmanga awm 2400 chuang an hmuchhuak a, heng mite hi thuneitute kutah an hlan nghal a ni. 

ILP dan palzutte chungchang ngaihtuahtu tur, Special Fast Track Court pawh district tinah dah turin an ngen bawk.