Law dept-in HC thuchhuak bawhzuina a tarlang dawn - Mukul

Meghalaya Chief Minister, Mukul Sangma chuan Rangbah Shnong (headmen) te chungchanga Meghalaya High Court-in tun hnaia thuchhuah a siam an bawhzuina chu Law department-in state sorkar hmaah a tarlan tur thu a sawi.

Nilainia cabinet meeting an neih zawhah he thu hi sawiin, Law department thutlukna azirin state sorkar chuan High Court thuchhuak chungchang a ngaihtuahzui ang a ti.

Headmen te thuneihna dan hnuaia pawm a nih theih nan High Court chuan a hmain state sorkar chu dan siamtir a rawt a ni.

Chief Justice Uma Nath Singh leh Justice T.N.K. Singh te awmna Division Bench chuan headmen te thuneihna chungchangah state sorkarin dan a siam a nih loh chuan Justice S.R. Sen awmna, High Court Single Bench-in December 10, 2014-a headmen te thuneihna a lo hlihsak tawh chu kaltlangpui rih a ni ang, a ti.

High Court chuan headmen te thuneihna leh an rorelna chu Right to Information Act huamtir a rawt bakah headmen te chu sorkar inrelbawlna bul ṭhut an nih avangin sorkar programme leh scheme hrang hrang kalpuinaah pawh mawhphurhna pek a rawt bawk.