NDFB(S) helte inbiak rawtna sorkar laipuiin a hnawl

Assam-a Songbijit-a kaihhruai, National Democratic Front of Boroland (NDFB) helte'n remna zawnga inbiak rawtna an siam chu sorkar laipui chuan a hnawl.

Sorkar laipui chuan pawisawilote chunga pawikhawihna thlen ṭhin helte chu biak a tum loh thu a tarlang nawn leh nghal.

Ministry of Home Affairs (MHA) official chuan security force te'n helte laka nasa taka beihpui an thlak avangin NDFB(S) helte pawhin inkahhai thuthlung ziak tura inbiak an duh nia a hriat thu sawiin, mahse chutianga helte rawtna siam chu an hnawl ṭhin thu a sawi.

Central-a NDA sor-karin thuneihna a chan aṭangin helte lakah hian khauh zawka hmalak a ni, a ti a, pawisawilote chunga tharum thawh ṭhin helte chu na taka beihlet zel an tum thu a sawi.

MHA official chuan kum 2014 December 23 khan NDFB(S) helte hi pawisawilo 70 chuang thihnaah an inhnam-hnawih tih a tarlang a, hei vang hian sorkar laipui chuan an lakah khauh taka kal a rel a ni, a ti. Helte laka security force te beihpui thlakna chu MHA chuan a ngaihven reng tih sawiin, sorkar laipuiah kar tin report an thehluh thin thu a sawi a, beihpui thlak avangin helte chu an dinhmun a chhiat tawh thu a sawi bawk.

"Hun kal ta khan sorkar laipui chu helte remruat danin a kal
ṭhin a, pawl ṭhenkhat chu inkahhai thuthlung an neih laiin tharum thawhna hrang hrangah an inhnamhnawih ṭhin. Hei hian helte avanga harsatna a chingfel lo tih kan hria a, tunah hian sorkar laipui chuan kalphung thar a hma lain, inbiakna pawh a huam zau thei ang berin a kalpui a, a chinfelna tluantling a zawng a ni. Mahse pawisawilote chunga tharum thawh bansan lo helte chu inbiakna neihpui kan tum lo," a ti.

Official chuan kum 2004 khan NDFB helte chuan mi 50 chuang an kahhlum hnuah inkahhai thuthlung siam a lo rawt tawh tih a sawi bawk a, Assam sorkar chuan hei hi a lo pawmpui a ni, a ti. State sorkar chuan sorkar laipui chu NDFB helte inkahhai thuthlung siampui turin a nawr a, mahse inkahhai thuthlung ringawt hi helte avanga harsatna chinfelna a ni lo, a ti.

"Kum 2008, October 30 khan NDFB helte hian mi 90 chuang an that a, hemi hnuah hian helpawl hi a phel a, sorkar laipui chuan NDFB hel pawl hnihte hi inbiakna a lo neihpui tawh a, mahse tunah chuan hetiang thil hi a thleng tawh lo ang," tiin MHA official chuan a sawi.