AP Governor-in postal service tihchangtlun a duh

Arunachal Pradesh Governor, JP Rajkhowa chuan Department of Post te service pek chu tih^-chang-tlun a duh thu sawiin, dâk hmanga thil thawn theihna chu state chhunga hmun tin leh kil tinah a awm tur a ni, a ti.

Governor Rajkhowa chuan Nilaini khan Raj Bhavan-ah North East Circle-a Chief Postmaster General, SC Barmma nen in-kawmin he thu hi a sawi a, speed post service tihchangtlun nan bungrua leh lehkhathawn phurhna atana helicopter hman a rawt.

Governor chuan Itanagar Postal Department-a Director post ruak chu a rang lama hnawhkhah a duh thu Barmma a hrilh bawk.

Postal Department-in Ita-nagar-a Parcel Hub leh ATM facility awmna tur, Postal Bank hawn a tum chu lawmawm a tih thu Governor Rajkhowa chuan a sawi bawk a, hetianga postal service tihchangtlunna tur a awm zel a nih chuan Arunachal Pradesh chu ngaipawimawh turin NE Circle Chief Postmaster General, Barmma chu a ngen nghal.

Arunachal Governor chuan India rama fai beihpui kalpui mek, Swachh Bharat Mission-ah Arunachal-a postal department official te chu theihtawp chhuaha inhnamhnawih turin a ngen bawk.

Hetihlai hian Chief Postmaster General, Barmma chuan Union Minister for Department of Telecom, Ravi Shankar Prasad-a'n January 31 hian Itanagar-ah Post Office building thar a hawn tur thu a sawi bakah postal department-in ‘Rural Postal Life Insurance Scheme’ a kalpui mek chungchang te a tarlang.