CRS-in March thlaah rel kawng enfiah dawn

22nd January, 2016

Commission of Railway Safety (CRS) chuan Badarpur-Kumarghat leh Kumarghat- Agartala inkara rel lian tlan theihna tur rel kawng zau (Broad Gauge) an siam mek chu kumin February thla emaw March tla tir lamah a enfiah dawn.

Rel lian chi, Broad Gauge (BG) rel lu chu January 11 tlai dar 4:10 khan Agartala station thleng tlantir chhin a lo ni tawh a, January 13 khan Union Minister of State for Railways, Manoj Sinha hoin, Badarpur (Assam)- Agartala (Tripura) inkarah rel lian tlan hmasa ber enchhinna neih a lo ni tawh bawk.

Badarpur-Kumarghat leh Kumarghat- Agartala inkarah hian rel lian a tlan theih tak avangin Northeastern Frontier Railway (NFR) chuan rel kawng chu CRS enfiah tira, pawmpuina neih thuai a beisei a, March thla hian khualzin phur rel service tir hman a tum a ni.