Nagaland-in rural area-a zirlaite Study material awmna pendrive sem dawn

Hripui leng vanga zirna inte khar a la nih avangin online class kalpui a ni a, mahse thing­tlang lamah network ṭhat tawk loh vangin online class hi kalpui mumal theih a ni lo. Hei vang hian Nagaland sorkar chuan rural area-a zirlaite chu study material dahkhawmna pendrive a sem dawn. 

Official chuan thingtlang lama cheng, Class V-12 inkar zirlaite hnenah in lama zirna an lo chhunzawm theihna turin pendrive hi sem a ni dawn tih a sawi. Hri leng vanga school khar a nih hnuah online education thawh hnihna chu zawh a ni tawh. Mahse thingtlang lam miten an zawm ve theih loh avangin, May 1 aṭanga online class neiha an zirte chu pendrive-ah hian dah a ni a,  sem an ni dawn tih Principal Director of School Education, Shanavas C chuan a sawi a ni. Online class thawh thumna hi August 18 aṭang hian neih ṭan leh a ni ang. 

Education department chuan rural area-a zirtirtu awmte chu an theih anga zirlaite lo pui tur hian a ngen bawk. Pawl hniam zawkte hnenah chuan an zirlai an chawlhsan mai lohna turin worksheet leh note-te sem fo turin zirtirtute chu hrilh an ni. Private school-te pawhin education department kal­tlangin pendrive hi an dil ve thei dawn a, mahse anni erawh chuan a man an chawi a ngai thung dawn a ni. Syllabus an duh dan azirin Rs 350-Rs 850 inkar an chawi a ngai ang. Nagaland-ah hian lock­down kalpui a nih avangin zirna in zawng zawngte chu August 31 thleng khar an la ni dawn a ni.