NE state pathumin statehood day an lawm

Hmarchhak state pathum- Tripura, Manipur leh Meghalaya chuan Ningani khan Statehood Day an lawm.

Prime Minister Narendra Modi chuan state pathumte hi a lawmpui thu thawnin, state hma-sawnna atan duhsakna a hlan nghal.

Tripura-ah chuan Governor Tathagata Roy-a'n n ni thum awh a lawmna neih tur chu hawng-in, kum 1972 aṭanga state hmasawnna hrang hrang tarlanna lehkhabu a tlangzarh nghal.

Tripura statehood day lawm-na hi vawiin thlengin neih a ni dawn a, hemi chhung hian cultural prog-ramme leh seminar te neih a ni ang.

Imphal-a Statehood Day lawmnaah Chief Minister Okram Ibobi Singh chuan thuchah sawiin, sum leh paia Manipur harsatnate a tarlang.

"Manipur chuan sum leh paiah harsatna nasa tak a tawk mek a, hetihlai hian state sorkar chuan sorkar laipui ṭanpuina engmah a hmu lo," tiin sorkar laipui chu state sorkar ṭanpui turin a ngen nghal.

"State dinhmuna Manipur a din aṭangin hmasawnna hrang hrang nasa tak kan hmu tawh a, state dangte el pha turin theihtawp chhuaha hmalak mek a ni," tiin Chief Minister Ibobi chuan a sawi.

Meghalaya-a Statehood Day lawmnaah chuan hmun hrang hrangah infiamna leh intihhlimna hun hman a ni a, Meghalaya leh Assam-in an thlen tur, South Asian Games vawi 12-na pualin, "Run for North-East" intlansiak an buatsaih nghal.

"Run for North-East" mara-thon-a telte hi Chief Minister Mukul Sangma chuan Fire Brigade mual aṭangin a vai liam. Intlansiakah hian state Sports Minister Zenith Sangma, India boxer lar M.C. Mary Kom leh Bollywood star Milind Soman te pawh an tel.

Mahnia lal awpna hnuai awm ṭhin, Tripura leh Manipur hi kum 1949, October khan India hnuaiah lakluh an ni a, January 21, 1972 khan state puitlinga hlankai an ni.

Meghalaya erawh a hmain Assam state-ah a bet a, North Eas-tern Region (Re-Organisation) Act, 1971 tlawhchhanin kum 1972, January 21 khan state pui-tlinga hlankai a ni.